Os científicos do Instituto de Investigación Sanitaria de Santiago (IDIS) Anxo Fernández Ferreiro e Alana Aragón Herrera recibiron o primeiro e segundo galardón, respectivamente, na modalidade ‘Traxectorias Emerxentes’ dos I Premios de Investigación en Saúde Transfronteirizos Galicia-Norte de Portugal. Este recoñecemento outórgano o Sergas e a Axencia Galega de Coñecemento en Saúde (ACIS) co obxectivo de darlle visibilidade á colaboración sanitaria entre o territorio galego e o luso.
A innovación no eido farmacéutico
Fernández Ferreiro, do grupo FarmaCHUSLab do IDIS, é coordinador da Unidade de Investigación e Innovación do Servizo de Farmacia da Área Sanitaria de Santiago e Barbanza. Outorgáronlle o premio “polas súas achegas innovadoras no ámbito farmacéutico”. “Non é só un recoñecemento persoal, senón o reflexo do traballo en equipo, do esforzo conxunto e da dedicación de tantas persoas coas que tiven o privilexio de colaborar”, asegurou o premiado durante o acto de entrega dos galardóns, celebrados hai uns días no Hospital Álvaro Cunqueiro de Vigo.
No seu discurso, o investigador tamén enxalzou o traballo dos seus compañeiros de FarmaCHUSLab e da unidade que el mesmo coordina, así como ao IDIS e ao Hospital Clínico de Santiago. Destas dúas últimas institucións salientou que o seu apoio “foi clave” para desenvolver o seu labor investigador. Tamén adicou unhas palabras aos finalistas, poñendo en valor o seu “traballo, esforzo e dedicación”.
Tratamentos máis eficaces para enfermidades do corazón
O segundo premio na modalidade ‘Traxectorias Emerxentes’ recaeu en Alana Aragón Herrera, investigadora posdoutoral do grupo de Cardioloxía Celular e Molecular do IDIS. O premio foi outorgado “polas súas investigacións sobre as enfermidades cardiovasculares e metabólicas”. A científica incorporouse ao instituto compostelán en 2016 e nos últimos anos publicou 22 artigos científicos e participou en diversos proxectos de investigación financiados por distintas entidades, como o Instituto de Saúde Carlos III ou a farmacéutica Bayer.
“Este galardón supón unha motivación e un gran estímulo para continuar desempeñando o meu labor científico e investigar novas estratexias terapéuticas no contexto das enfermidades cardiovasculares. En concreto, a insuficiencia cardíaca con fracción de exección preservada, para a que non existe un tratamento eficaz”, expresou a premiada, quen tamén puxo en valor “a calidade científica” dos finalistas e adicou os seus agradecementos aos seus compañeiros de laboratorio, así como á investigadora principal do grupo, Francisca Lago Paz.
Finalistas de Galicia e Portugal
Ademais de Anxo Fernández e Alana Aragón Herrera, outros tres investigadores do IDIS foron finalistas nesta primeira edición dos Premios de Investigación en Saúde Transfronteirizos: Alberto Ouro Villasante, do grupo Neuroenvellecemento; Javier Conde Aranda, do grupo Gastroenteroloxía Molecular e Celular, e Juan Ruiz Bañobre, do grupo Oncoloxía Médica Traslacional, Oncomet.
Estes Premios de Investigación en Saúde enmárcanse no proxecto europeo de cooperación territorial Transfiresaúde, co que Galicia e o Norte de Portugal traballan na procura de solucións vinculadas ao envellecemento activo e para o impulso da medicina personalizada. Este proxecto conta cun orzamento de 1,8 millóns de euros.
Na modalidade destinada á Rexión do Norte de Portugal valoráronse os Proxectos de Investigación e Talentos emerxentes, con aplicación nos coidados de saúde primarios. En Galicia, ademais da modalidade na que resultaron premiados os investigadores do IDIS, recoñeceuse como o mellor Proxecto de Investigación Sanitaria en Atención Primaria o de E-consulta avanzada de Cardioloxía, dirixido polo doutor Juanatey, do CHUS, e cuxo equipo de investigación está conformado polos doutores Juan José Sánchez Castro, Alejandro Virgós Lamela e María Pilar Mazón Ramos.
