O perigo que supoñen os incendios non resulta descoñecido en Galicia. A Xunta cifrou en 118.966 hectáreas a superficie queimada en todo 2025, un número que o Sistema de Información de Incendios Forestais da Comisión Europea (EFFIS) do programa Copernicus eleva a máis de 171.000 hectáreas dende o inicio do verán. Agosto de 2025 pasou á memoria colectiva como un dos meses máis escuros para o ecosistema da comunidade.
Ante esta situación, non tardaron en chegar as reclamacións para elaborar un plan de medidas de actuación e, sobre todo, de prevención. A suma de diferentes factores, entre eles o aumento de temperaturas derivado do quentamento climático, forma un escenario traxicamente apropiado para a propagación de lumes. Neste contexto, o proxecto europeo FIREPRIME lanza unha aplicación gratuíta con afán de concienciación e prevención.
FIREPRIME: ciencia internacional ao servizo social
A iniciativa elaborou unha ferramenta gratuíta para axudar a medir os posibles perigos fronte ao lume. A aplicación, que pode descargarse en Google Play e App Store, está deseñada para que os residentes de zonas forestais poidan avaliar o risco dos seus fogares fronte a incendios forestais. Ademais, propón recomendacións personalizadas para reducir os riscos da vivenda.
Este programa ofrece unha modalidade básica, cun cuestionario de 10 preguntas, e unha avanzada, con ata 23. A ferramenta foi desenvolta por investigadores da Universitat Politècnica de Catalunya (UPC), a Fundación Pau Costa e os organismos RISE, de Austria, e BOKU, de Suecia. Deste xeito, queda patente que a loita contra o lume é un reto compartido dentro e fóra dos límites nacionais.
Como funciona a aplicación?
Para realizar un diagnóstico preciso, FIREPRIME emprega datos do programa europeo Copernicus —observatorio da Terra que ofrece información gratis e de libre acceso tomada de satélites e bases a nivel terrestre— e indicacións introducidas polo usuario sobre os materiais de construción da edificación e sobre a vexetación próxima ao domicilio.
Así, a ferramenta combina a información sobre os riscos da área xeográfica e a vulnerabilidade estrutural dos edificios co gallo de presentar unha análise fiable acompañada de suxestións de protección fronte a incendios.
