As xornadas científicas ‘A luz da ciencia’ celebran a súa cuarta edición cun programa dedicado ao pensamento científico e o xénero. Esta iniciativa, que botou a andar no pasado ano da man da área de Patrimonio, trasládase nesta ocasión ao Pazo de Mariñán e ao Museo Nacional de Ciencia e Tecnoloxía da Coruña (MUNCYT) e terá lugar os días 13,14 e 15 de xaneiro.
Estes encontros científicos están concibidos para reflexionar sobre as fendas de xénero que están vixentes no eido da práctica profesional e investigadora das disciplinas científicas, achegando visións desde tres eidos diferentes: as aulas e o proceso formativo, a lexislación e a realidade profesional, e a divulgación e a comunicación científica. A este respecto, o deputado de Patrimonio, Xosé Lois Penas, pon o foco en que segundo datos globais da ONU, menos do 30% de investigadoras e científicas de todo o mundo son mulleres, e tan só 1 de cada 3 estudantes de carreiras universitarias do ámbito da ciencia, tecnoloxía, enxeñería e matemáticas (coñecido como ámbito CITM) é unha muller.
“Cando puxemos en marcha este programa de xornadas propuxémonos achegar a ciencia á sociedade dun xeito accesible e tratando temas de interese para o conxunto da cidadanía e, neste sentido, abordar a situación de desigualdade de xénero que se observa nas disciplinas do chamado ámbito CITM é de xustiza e necesario ” asegura Xosé Lois Penas.
As tres sesións correrán a cargo de relatoras que coñecen de primeira man a realidade da práctica científica.
Xoves 13 de xaneiro
A primeira xornada, dedicada a ‘Didáctica das ciencias experimentais’ celebrarase no Pazo de Mariñán ás 18:00 horas. Os contidos xirarán en torno a análise da didáctica das ciencias experimentais e a segregación nas formacións científicas; a educación CTIM ( Ciencia, Tecnoloxía, Enxeñería e Matemáticas); o tratamento da perspectiva de xénero e a ciencia nas aulas e a reflexión sobre a necesidade de fomentar a vocación científica e a importancia da visibilización das mulleres na ciencia. As relatoras desta xornada serán Mireia Colom e Susaina Figuera da Fundació catalana per a la recerca i la innovació.
Venres 14 de xaneiro
A segunda xornada, “Ciencia, investigación e xénero”, terá lugar no Pazo de Mariñán ás 18:00 horas. os contidos xirarán en torno a revisión lexislativa; á Lei Ángeles Alvariño; á análise da perspectiva de xénero na ciencia e na investigación científica; a visualización das realidades laborais; ao efecto Matilda e campaña #NOMOREMATILDA e ao papel dos medidos de comunicación. As relatoras forman parte da Rede galega de investigadoras, e son: María de la Fuente Freire, científica galega especialista en nanotecnoloxía; Elena Lendoiro Belío, investigadora posdoutoral; Vanessa Valdiglesias García, bióloga,
recoñecida como Mellor Investigadora Xove de Europa pola Sociedade Europea de Xenómica e Mutaxénese Ambiental; Zulema Varela Río, bióloga, máster en enxeñería ambiental, tese de doutoramento en ecotoxicoloxía.
Sábado 15 de xaneiro
A terceira e última xornada, “Divulgación, comunicación científica e xénero”, celebrarase no Muncyt ás 11:30 horas. Os contidos centraranse na fenda de xénero na divulgación científica e nas persoas consumidoras de ciencia e nas Medidas que contribúan a racharesta situación de desigualdade. As relatoras serán Maite Vence de OBSERVER, Isa Loureiro, ilustradora e Paula Otero Sánchez, científica do grupo de investigación xenomas e enfermidade.
A asistencia ás xornadas é de balde, mais será preciso realizar inscrición previa a través do seguinte formulario
