A rede autonómica de investigación Inmunogenom, que procura solucións innovadoras no control sanitario do sector acuícola en Galicia, organiza para o vindeiro 24 de outubro a Caravana pola acuicultura, un encontro para difundir a importancia e a seguridade asociada á produción de moluscos.
Á xornada están convidados diversos sectores vencellados ao eido acuícola e científico (produtores, comercializadores, consumidores, hosteleiros, xornalistas, divulgadores e investigadores) para dar a coñecer de primeira man como é o proceso de cultivo e comercialización dos moluscos.
“Estamos convencidos das bondades da produción de organismos acuáticos, por ser a única alternativa sostible co crecemento da poboación humana, e tamén pola calidade e seguridade asociadas a estas producións”, explica Paulino Martínez, catedrático de Xenética da USC e coordinador de Inmunogenom. Engade o científico que “non menos importante é a relevancia da acuicultura para o mantemento das comunidades costeiras rurais, especialmente no caso galego”. Deste xeito, “como científicos queremos trasladar o noso convencemento sobre o valor da acuicultra e a importancia de investir na mellora das producións e a súa sustentabilidade a través da investigación”.
O programa da xornada vai abranguer unha ampla gama de actividades, como charlas, entrevistas con diversos representantes do sector produtivo e investigador, visitas a diversos modelos de cría e produción de moluscos e degustación de produtos.
A rede Inmunogenom está financiada polas Axudas para a consolidación e estruturación de unidades de investigación competitivas e outras accións de fomento nas universidades do Sistema Universitario Galego, nos organismos públicos de investigación de Galicia e noutras entidades do Sistema galego de I+D+i”, da Consellería de Educación e Ordenación Universitaria.
