En Galicia calcúlase que hai arredor de 70.500 persoas diagnosticadas de alzhéimer ou algún outro tipo de demencia. Así o sinalan dende Demgal, unha plataforma dixital concibida como un directorio de servizos sociosanitarios vinculados a estas patoloxías neurodexenerativas. A iniciativa foi impulsada pola neuróloga Clara Domínguez, do Hospital Clínico de Santiago de Compostela (CHUS). Entre os recursos que ofrece a a páxina web destacan as guías prácticas para saber como actuar en cada fase da demencia, así como un mapa interactivo que permite localizar centros residenciais, centros de día e servizos de envellecemento activo en toda a comunidade. Na actualidade, o portal recolle 198 servizos en Galicia.
Por provincias, A Coruña concentra o maior número de recursos, con 63, dos cales 26 son centros de día e 33 residencias. Séguenlle Ourense, con 48 centros; Pontevedra, con 47; e Lugo, con 39. Cidades como Vigo, A Coruña, Pontevedra, Ferrol, Santiago de Compostela, Lugo e Ourense concentran máis de tres recursos especializados en demencia, cunha presenza destacada de centros residenciais.
No caso de Vigo, conta con tres centros de día —situados nos barrios de Valadares, Teis e Coia— e catro residencias. Ferrol dispón de tres centros de día e tres residencias, mentres que Santiago de Compostela suma catro residencias e un centro de día. Noutros concellos de menor tamaño, como A Rúa (Ourense), rexístranse dúas residencias e un centro de día.
A ferramenta inclúe tamén outros servizos, como asistencia a domicilio, estimulación cognitiva, fisioterapia ou terapia ocupacional, aínda que polo momento non hai rexistros destas categorías en Galicia. O proxecto presentouse o pasado 25 de marzo e atópase nunha fase inicial de desenvolvemento. O seu obxectivo principal é informar, acompañar e orientar ás persoas no proceso de enfrontamento destas patoloxías, tanto ás persoas diagnosticadas como ás súas familias e coidadores.
Podes consultar o mapa da plataforma Demgal na seguinte ligazón.
