A demencia é unha enfermidade complexa que afecta a miles de galegos. Moitos poden preguntarse se teñen maior probabilidade de sufrila. Sen ser alarmistas e desde a prudencia coa que se deben tomar este tipo de datos, agora podes facer os teus cálculos cunha ferramenta en inglés que mide as posibilidades de ter esta doenza. Project Big Life presenta unha estatística titulada “Canto tempo vivirei”, que cruza os datos e utiliza algoritmos segundo diversas estatísticas. O único requisito é ter máis de 55 anos.
A páxina precisa dalgúns datos básicos para facer os cálculos. Entre eles, por exemplo, a idade, o consumo de alcohol e tabaco ou hábitos como a cantidade de verduras e froita que comes e o número de días e a intensidade coa que fas exercicio durante a semana. Outros factores como o peso, a altura, e ata algúns sociodemográficos como poden ser os teus estudos serán precisos para dar o resultado.
Un maior consumo de patacas, asociado a unha peor dieta
O sistema utiliza numerosos datos e estatísticas en colaboración co Hospital de Ottawa. Por exemplo, preguntan sobre o consumo de patacas, algo que afecta de forma negativa no cálculo. O motivo é que segundo as bases de datos as persoas que inxiren máis ese alimento ou os zumes de froitas están asociados a unha peor dieta. O motivo de que non se fagan outras preguntas, como a cantidade de azucre e graxas, por exemplo, é porque se teñen menos datos sobre outras variables.
O apartado persoal tamén afecta nas probabilidades de ter demencia. Por iso, a calculadora tamén pregunta a situación sentimental e se na túa veciñanza existe máis apoio social ou menos en comparación co resto do teu país. Tamén inflúe se falas máis dun idioma. Se queres comprobalo por ti mesmo, podes facelo premendo nesta ligazón.
