A nova edición do ciclo de charlas e mesas redondas Ciencia en feminino abre a súa programación coa entrevista á física galega Mar Capeáns. Leva traballando dende 1992 na Organización Europea para a Investigación Nuclear (CERN), onde se especializou na construción de aceleradores de partículas. Dende 2021 forma parte da dirección da entidade, ao liderar o Departamento de Enxeñaría Civil e do Sitio. Falamos con ela sobre a súa vocación, o seu apaixonante traballo e, sobre todo, como lograr que as científicas rompan o teito de cristal.
Ciencia en feminino continuará ao longo de todos os mércores do mes de marzo. A primeira mesa redonda celebrarase o día 12 e nela abordarase como ser científica no século XXI. Contarase coa participación das investigadoras galegas María Tubío-Fungueiriño, Cintia Folgueira e María José Ginzo. Esta actividade terá continuidade o mércores 19 coa entrevista á catedrática de Economía María Loureiro, Premio María Wonenburger 2024. O ciclo Ciencia en feminino concluirá o día 26, coa celebración da última mesa redonda. Yasmina Martínez, Marta Castiñeira e Paula Gutiérrez-Muñoz analizarán como romper os estereotipos na ciencia.
