A última entrega do ciclo de charlas e mesas redondas Ciencia en feminino, dentro da programación sobre o 8M da Deputación de Pontevedra, remata cun debate no que participan as científicas Yasmina Martínez, Marta Castiñeira e Paula Gutiérrez. Expoñerán a súa vivencia e opinión sobre os estereotipos no sector. En que aspectos avanzamos? Cales quedan por traballar? Nesta ocasión, as investigadoras analizan como os tópicos inflúen na escolla da carreira, como rachar coas especialidades masculinizadas ou a situación actual do teito de cristal.
Ciencia en feminino remata este mércores 26 de marzo co estreo da mesa redonda. Podes desfrutar a última conversa coa catedrática de Economía María Loureiro, Premio María Wonenburger 2024, conducida por Laura Filloy, na web e nas plataformas de GCiencia.
