A satisfacción dos galegos coa súa vida e a percepción sobre a súa saúde mellora respecto aos datos do ano 2019, segundo a última enquisa publicada polo Instituto Galego de Estatística. O organismo vén de publicar o módulo específico da Enquisa estrutural a fogares dedicado ao estudo do capital social correspondente ao ano 2024, unha operación que mide o grao de benestar da cidadanía maior de 16 anos en Galicia.
Esta enquisa xa se realizara en 2014 e 2019, e os datos completos e actualizados poden consultarse na web do IGE. No 2024, o grao de satisfacción dos galegos e galegas coa súa vida foi de 7,31 puntos nunha escala de 0 a 10, sendo 0 nada satisfeito/a e 10 plenamente satisfeito/a. O 73,71% das persoas enquisadas declarou ter unha satisfacción superior a 7.
Xeograficamente, a cidadanía de Lugo Oriental (A Fonsagrada, Os Ancares e Sarria) e Ourense Sur (A Limia, Baixa Limia, Terra de Celanova, Verín e Viana) son os que máis satisfeitos están.
Cada vez mellor
As cifras amosan unha melloría continuada. No ano 2014, a media de satisfacción coa vida situábase en 6,74, cun 59,82% da poboación valorando por enriba de 7. En 2019, a media subiu a 7,15 e a porcentaxe de persoas satisfeitas acadou o 68,36%.
Aa enquisa abrangue tamén outros aspectos relevantes, como a calidade das relacións persoais dos residentes na nosa comunidade, a solidariedade e comportamento cidadán, o grao de confianza nas persoas e institucións ou os principais problemas das vivendas de Galicia.
Podes consultar os datos completos da enquisa nesta ligazón.
