A Consellería de Medio Rural respondeu esta semana ás críticas vertidas por un grupo de investigadores do Centro de Investigacións Agrarias de Mabegondo (CIAM), tras o anuncio por parte da Xunta do investimento de 10 millóns de euros no Pazo de Quián (Boqueixón) para converter o complexo nun “espello do rural galego”. Os científicos cualificaban a decisión como “un novo exemplo do proceso de minado e destrución gratuíta das estruturas de investigación agraria galega”. Porén, Medio Rural cualifica de “completamente falso que esta Consellería non atenda nin cubra as necesidades dos centros de investigación e de formación, xa que para o vindeiro ano 2020 dedica máis de 1,2 millóns de euros a mellorar estes organismos”.
Nunha nota emitida aos medios, a Consellería expón que “os orzamentos de 2020 son os da consolidación da Axencia Galega da Calidade Alimentaria (Agacal) e, polo tanto, dos centros dependentes deste ente, polo que a aposta da Xunta pola investigación e pola formación é clara”, apuntan.
Científicos agrarios denuncian a “destrución” do sector por parte da Xunta
Entre as partidas orzamentarias, sosteñen que haberá incrementos nos “investimentos reais no conxunto dos centros da Axencia, cun incremento do 43,83%, investimentos de transferencias de capital, cun incremento do 23,45%, e en gastos de funcionamento dos centros, cun incremento dun 29%”.
Banco de xermoplasma
Un dos aspectos que xerou máis malestar entre os investigadores asinantes dun comunicado difundido estes días foi o do traslado do banco de xermoplasma do CIAM a Boqueixón. Neste punto, Medio Rural expón que “dignificar, visibilizar e xestionar adecuadamente os recursos fitoxenéticos de Galicia non se pode interpretar como poñelos en risco baixo argumentos relativos á súa ubicación”.
Ante as críticas dos investigadores por levar as sementes a Quián, fontes da consellería sinalan que “non é certo que se traslade este Banco, pois a realidade é que non está ubicado nun único centro ou recinto”. Subliñan que o que pretende Medio Rural “é precisamente agrupalo nun edificio para centralizar a súa xestión e conservación por parte do persoal ao seu cargo. Deste xeito, tamén se poderá dar a coñecer este material xenético autóctono a otros investigadores”. Conclúen, con todo, que a investigación desenvolverase desde o CIAM, “como vén sendo ata o de agora”.
