Unha borrasca atlántica poñerá fin ao tempo anticiclónico na comunidade. Tras acadar récords de temperatura no mes de abril e desfrutar dun clima de verán, esta semana producirase un cambio de tempo radical. Caen os termómetros e os ceos abertos cubriranse de nubes, que deixarán precipitacións dende o xoves. Este martes Galicia aínda se mantén baixo a influencia das altas presións e con vento forte que sopra do nordés e que se intensificará pola tarde. Unha masa de aire fría está baixando os valores e en cidades como Ourense prodúcese unha remarcable oscilación térmica: de 6 a 23 graos. Será o mércores cando Galicia se sitúe nunha zona de transición e empece a cambiar o panorama meteorolóxico.
No ecuador da semana os ceos empezarán a cubrirse cara ao final do día polo norte, e na madrugada do xoves pode producirse algunha precipitación. As temperaturas sufrirán lixeiros descensos. MeteoGalicia apunta que Galicia se atopa nunha situación de “tempo cambiante” e que o xoves empezarán as chuvias polo aire frío situado nas capas altas da atmosfera. A inestabilidade aumentará co avance do día, con intervalos nubrados e chuvascos ocasionais. Unha fronte asociada a unha borrasca atlántica chegará a Galicia ao longo do venres descargando precipitacións máis xeneralizadas na segunda metade do día. Baixan as temperaturas: o valor máximo esperado son os 15 graos da Coruña e Ourense.
O portal eltiempo.es apunta que dende o xoves a borrasca atlántica empeza a aproximarse ao noroeste peninsular e traerá precipitacións a Galicia, Asturias, Cantabria e zonas de Castela e León. Neste senso, o “núcleo” da borrasca podería entrar na tarde do venres. Así, cruzaría a península ao longo do sábado, podendo converterse no día “máis inestable da semana”, con chuvias xeneralizadas pola mañá. De cara ao domingo, a borrasca afastarase da comunidade e agárdase unha xornada máis tranquila no meteorolóxico, con chuvias máis probables no norte peninsular.
Os ventos do suroeste, particulares das borrascas atlánticas, soprarán especialmente fortes na Costa da Morte. Segundo o organismo autonómico, despois de perder a influencia anticiclónica, Galicia rexistrará temperaturas baixas para a época do ano. Polo tanto, neste último tramo da semana e coincindo cos últimos días de abril, o tempo será especialmente inestable na comunidade galega. Aínda é cedo para establecer predicións de cara a semana que vén pero todo apunta a que os ceos continuarán cubertos e caia algunha precipitación de cara ao martes. Sobre o festivo do 1 de maio, o portal eltiempo.es alega que está enmarcado nunha semana na que haberá precipitacións por “enriba da media” no noroeste peninsular, Illas Baleares, Pirineos, norte de Aragón, Cataluña e Navarra.
