En 1998 saía por primeira vez o informe “Planeta Vivo” de WWF (Fondo Mundial da Natureza), un documento no que se analizaba a situación da biodiversidade mundial. 20 anos despois, na súa 12ª edición, o documento, presentado esta semana, expón unha situación preocupante: Desde a década dos 70, o índice Planeta Vivo (IPV) un indicador co que o informe mide os niveis de abundancia da biodiversidade, presenta unha diminución xeral do 60% no número de vertebrados.
Este indicador analiza 16.704 poboacións de 4.005 especies de vertebrados de todo o mundo, e recolle unha visión panorámica do estado das especies, os impactos xerados polo ser humano e as solucións dispoñibles. O traballo realízase coa colaboración científica da Rede da Pegada Global e a Sociedade Zoolóxica de Londres.
“A ciencia amosa a dura realidade. O informe leva anos chegando á mesma conclusión, e é preocupante: a biodiversidade mundial diminúe a un ritmo alarmante“, sinalan desde WWF.
Entre os principais factores que xeran este problema están, segundo sinala a entidade, a perda ou degradación do hábitat, a sobreexplotación de recursos, a contaminación, as especies exóticas invasoras e o cambio climático.
Datos preocupantes
Algúns dos datos presentados no informe Planeta Vivo son especialmente preocupantes. Sinalan, por exemplo, que “case o 20% da Amazonía desapareceu en só 50 anos”, que a diminución de especies nos trópicos é “especialmente pronunciada”, sobre todo en Centroamérica e Sudamérica, cunha perda do 89%. Do mesmo xeito, o documento sinala que a Terra perdeu “aproximadamente a metade dos seus corais de augas someras nos últimos 30 anos”, o que ten graves consecuencias para os seres humanos, xa que “200 millóns de persoas dependen dos arrecifes para protexerse das marexadas ciclónicas e as ondas”.
Podes consultar o Informe Planeta Vivo (en PDF) nesta ligazón.
