Despois dunha fin de semana marcada pola influencia dunha profunda borrasca orixinada en Irlanda e que salpicou á comunidade con intensas chuvias, Galicia amence este luns co paso dunha fronte fría, o cal implicará máis precipitacións e un descenso moderado das temperaturas. Ademais, MeteoGalicia vén de activar a alerta amarela no litoral da provincia da Coruña, onde as ondas chegarán aos catro metros de altura este 21 de outubro. As temperaturas máximas non superarán os 22 ºC, mentras que nalgunhas rexións de Ourense manteranse moi por debaixo, roldando os 15 graos.
Durante o martes a comunidade quedará baixo a influencia das altas presións e coa circulación dun vento de compoñente nordés. As temperaturas mínimas sufrirán un lixeiro descenso, chegando aos 9 graos no interior de Lugo, mentres que as máximas experimentarán un lixeiro ascenso na metade sur de Galicia. Agárdanse néboas nas primeiras horas do día, que irán desaparecendo cara a tarde.
A chegada dunha nova fronte
O mércores mantense a situación anticiclónica, coas altas presións movéndose cara o leste: agárdase tempo seco na meirande parte do territorio, cunhas nubes que irán aparecendo ao longo da xornada. As temperaturas sufrirán un acusado descenso no terzo norte de Galicia. As mínimas roldarán os 11 graos no litoral de Lugo, baixando aos 7ºC no interior.
Na costa das provincias de Pontevedra e da Coruña as mínimas superarán os 13 graos. No caso do interior de Pontevedra, as temperaturas máximas ascenderán moderadamente ao longo da semana, chegando aos 26ºC na xornada do mércores. O mesmo ocorrerán no caso das capitais de Vigo e Ourense, que experimentarán máximas de 25 graos.
O xoves o paso dunha nova fronte aumentará a probabilidade de chuvias intensas nas catro provincias. Segundo Eltiempo.es, o noroeste de España tamén experimentará unha baixada importante nas temperaturas, abrindo a porta ao aire frío. “Trala fronte irase recuperando a influencia anticiclónica, mais non a media dos termómetros“, que segundo explica MeteoGalicia será baixa para a época.
