Meteored informa que unha fronte fría entrará mañá polo noroeste peninsular, o que deixará unha xornada pasada por auga en Galicia. O martes prevese, así, un cambio importante marcado pola nubosidade e as choivas que poderán ser localmente treboentas e persistentes. A plataforma meteorolóxica tamén indica que o modelo europeo apunta a chegada das primeiras precipitacións sobre a comunidade galega a partir das 11 horas de mañá, con acumulados que superarán os 40, 50 litros por metro cadrado nas rexións do norte.
A calma antes da tormenta
A semana arranca con Galicia no límite entre as altas e as baixas presións, como informa Meteogalicia. A configuración atmosférica, sinala o portal meteorolóxico, deixará néboas no interior e nubosidade no litoral norte, mais ao longo do día volverá o azul aos ceos galegos. Durante a xornada pervalecerán as temperaturas propias da calor que se vén arrastrando dende os últimos días: as máximas superarán os 20 graos en toda a comunidade, pero haberá importantes diferenzas entre as rexións de Galicia.
No momento de mais calor prevese acadar 23 graos na Coruña; 25 en Ferrol; 27 en Vigo, Pontevedra e Santiago de Compostela; 29 en Lugo e 34 en Ourense. Deste xeito, haberá unha diferenza de 11 graos entre o noroeste e o sudeste da comunidade. As mínimas manteranse entre os 15 e os 17 graos en toda Galicia.
A chegada da fronte
Ao longo da mañá do martes entrará unha fronte fría polo noroeste que deixará ceos nubosos polo norte e o oeste do territorio galego, con momentos despexados alternados durante o día. A xornada estará marcada polas choivas, que avanzarán de oeste a este e terán especial intensidade no litoral coruñés.
A chegada desta fronte tamén se fará notar nas temperaturas: aínda que as mínimas apenas experimentarán cambios con relación ao luns, as máximas experimentarán unha caída considerable, de ata 8 graos nalgunhas das cidades galegas. Deste xeito, Santiago de Compostela quedará por debaixo da vintena, con só 19 graos de máxima; Ferrol, A Coruña, Lugo, Pontevedra e Vigo estarán entre os 20 e os 23 graos; e os termómetros de Ourense marcarán 27. A capital galega e a cidade lucense acollerán as baixadas máis drásticas fronte á xornada anterior.
Volta á estabilidade
O mércores Galicia estará marcada polas altas presións con circulación do nordés, como apunta a axencia meteorolóxica galega. Isto deixará nubes baixas no interior e néboas que se disiparán ao longo do día. Aínda poderán rexistrarse episodios illados de choivas na Mariña que, non obstante, remitirán de cara á tarde.
A nivel térmico, as mínimas quedarán por debaixo dos 15 graos en toda a comunidade, coa previsión máis baixa (de 10 graos) en Lugo. As máximas, pola contra, manteranse na metade norte e aumentarán no sur. Así, agárdase chegar a 26 e 27 graos en Vigo, Pontevedra e Ourense, mentres que as demais cidades de Galicia rondarán entre os 21 e os 23 graos no punto de máis calor do día.
