Un potente anticiclón subtropical está a provocar un persistente episodio de cúpula de calor que, segundo as predicións semanais de anomalías térmicas do European Centre for Medium-Range Weather Forecasts (ECMWF), podería prolongarse ata comezos de xullo. As previsións apuntan a que, durante boa parte da semana, Galicia poderá acadar máximas de ata 36 graos e mínimas que non baixarán dos 10 graos, unhas temperaturas moi elevadas para o mes de maio.
Este escenario podería converter maio de 2026 nun episodio histórico: en moitos países, entre eles España, podería ser a primeira vez que se rexistre unha onda de calor neste mes.
Con todo, a semana comeza cun contexto de inestabilidade, xa que aínda poden formarse tormentas localmente fortes na comunidade. Hai aviso amarelo activado no centro e na montaña de Lugo cara ao final da tarde. Nas últimas 24 horas, Galicia rexistrou 2.343 raios, con especial incidencia na metade norte do territorio. A actividade tormentosa diminuirá de cara ao martes, aínda que o mércores e o xoves poderían reaparecer debido ao aumento exponencial das temperaturas.
As altas presións impiden a renovación do aire en superficie, que se quenta intensamente sobre as áreas continentais debido a dous factores principais: a forte insolación diurna propia desta época do ano e a subsidencia —o descenso de aire— asociada á dorsal anticiclónica, segundo explican desde o portal meteorolóxico Meteored.
36 graos de máxima en Ourense
Ourense será a gran cidade galega que rexistrará as temperaturas máis elevadas, segundo as previsións de MeteoGalicia. O mércores 27, o termómetro poderá alcanzar os 36 graos de máxima, mentres que as mínimas se situarán arredor dos 14 graos. Lugo tamén superará a barreira dos 30ºC, ao igual que Ferrol, Pontevedra e Santiago de Compostela. Pola contra, as cidades costeiras de Vigo e A Coruña presentarán valores máis moderados, con máximas previstas de 29 e 27 graos, respectivamente.
A maior oscilación térmica darase en Lugo, onde a diferenza entre a temperatura máxima e a mínima durante o mércores será de ata 19 graos. En calquera caso, as temperaturas nocturnas tamén serán elevadas en boa parte da comunidade: Pontevedra terá unha mínima de 16 graos, Vigo de 17 e Santiago de Compostela de 19ºC.
