A semana en Galicia comeza con inestabilidade atmosférica, pero as temperaturas irán en aumento cara a mediados de semana. Unha pequena fronte, que achegará nubes ao norte peninsular e deixará chuvias na comunidade, dará paso a un ascenso térmico que levará os termómetros ata os 30ºC en cidades como Ourense. As altas presións favorecerán un ambiente máis caloroso durante as horas centrais do día e tamén noites menos frías. Segundo informa Meteored, o mércores producirase un salto térmico, con ata cinco graos máis en Vigo e oito máis en Lugo. A causa será a chegada dunha dorsal de aire cálido sobre a Península, que se manterá ata o venres.
Os datos da previsión de MeteoGalicia indican que Ourense pasará dos 23ºC previstos para o martes aos 30ºC do xoves. Lugo quedará moi preto, cunha subida de oito graos en apenas 48 horas, ao pasar dos 21 aos 29ºC. Pola súa banda, Santiago de Compostela arrancará con 19 graos, subirá ata os 25ºC e alcanzará os 27ºC o xoves. Pontevedra e Vigo manterán rexistros semellantes: comezarán a semana con 20ºC e chegarán aos 26 e 25 graos, respectivamente, o xoves.
As variacións máis moderadas daranse nas cidades do norte da comunidade. A Coruña experimentará unha subida de dous graos, pasando dos 21 aos 23ºC, segundo o servizo meteorolóxico galego. En Ferrol, pola contra, agárdase unha maior oscilación térmica: comezará o martes con 20 graos, ascenderá ata os 25ºC o mércores e volverá baixar ata os 23ºC o xoves. Con todo, A partir do sábado entrará unha masa de aire máis fría polo noroeste, desplomando as máximas en Galicia.
