Luns 27 Maio 2024

Retirada unha acacia de tres toneladas á beira do Tins, o primeiro río de España con dereitos

Un grupo de 16 voluntarios participa na primeira xornada de eliminación de especies exóticas invasoras nas marxes do curso fluvial de Outes

Un grupo de 16 voluntarios retirou o pasado domingo un exemplar de acacia negra (Acacia melanoxylon) de tres toneladas á beira do Tins, o primeiro río de España con dereitos. A actuación, que se levou a cabo no marco do proxecto ReNatur_Outes, ten por obxectivo eliminar o arborado de especies exóticas invasoras á beira do curso fluvial do concello coruñés. Os organizadores cualificaron a primeira xornada de voluntariado ambiental como “éxito absoluto”.

Os traballos xa comezaran en días previos, abatendo as árbores de maior porte. Ao abeiro do proxecto, elaboráronse cadeiras a partir dos toros das árbores que irán destinadas ao patio do CEIP Plurilingüe de Outes, deseñado polo propio alumnado. Tamén se aplicou a técnica de descasque nos tocóns para eliminar por completo estas especies.

Publicidade

Segundo informan dende a organización, as actividades continuarán nos próximos meses para eliminar a totalidade de exemplares de mimosa (Acacia dealbata), robinia (Robinia pseudoacacia) e eucalipto (Eucalyptus globulus) das marxes do Tins, “contribuíndo así a renaturalizar este espazo natural de grande valor”. A acción compleméntase coas realizadas no pasado inverno, cando se plantaron case 300 árbores e máis dun cento de arbustos na zona de ribeira.

Liderado polo Concello de Outes, Renatur_Outes conta coa participación de investigadores das tres universidades públicas galegas, a Fundación Montescola e o CEER (Centro de Estudos Eurorrexionais Galicia- Norte de Portugal) e o apoio da Fundación Biodiversidad do Ministerio para la Transición Ecológica y el Reto Demográfico (MITECO) no marco do Plan de Recuperación, Transformación e Resiliencia (PRTR), financiado pola Unión Europea – NextGenerationEU.

No eixo do proxecto están a recuperación do bosque de ribeira, o control de especies exóticas invasoras, como as distintas especies de acacia presentes (Acacia dealbata e Acacia melanoxylon), a Tradescantia fluminensis ou as plantas do xénero Crocosmia, a limpeza de residuos da contorna fluvial, e a sensibilización ambiental mediante accións de voluntariado, formativas e divulgativas, fomentando a participación pública da cidadanía de Outes mediante sesións de gobernanza cidadá ao longo de toda a vida do proxecto. Desde xeito non só se pretende alcanzar unha recuperación e mellora da biodiversidade, senón xerar un compromiso social máis alá da propia vida do proxecto.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

O Concello de Outes aproba por unanimidade a declaración de dereitos do río Tins

O proxecto contribúe á recuperación do bosque de ribeira coa plantación de centos de árbores e arbustos autóctonos

O río Tins será o primeiro do Estado en ter dereitos

Unha declaración oficial recoñecerá a lexitimidade do curso fluvial de Outes a non ser contaminado ou danado por actividades humanas

Cambiar de modelo forestal e outras medidas para frear a expansión do eucalipto en Galicia

O Consello da Cultura Galega publica un informe que analiza o impacto sobre o patrimonio cultural e natural das especies forestais de rápido crecemento

Un proxecto da UVigo estuda como obter bioetanol a partir de eucalipto e mimosa

O obxectivo é investigar novas rutas de aproveitamento de biomasa forestal, concretamente de especies moi abundantes e invasoras en Galicia