A conta atrás para Nadal xa está en marcha e, como cada ano, repítese a mesma pregunta: Que tempo fará? As previsións meteorolóxicas aínda se expresan en forma de tendencias, pero segundo MeteoGalicia os distintos escenarios van gañando consenso. Todo apunta a que, a partir da vindeira semana, as temperaturas serán máis frías do habitual para esta época do ano. No interior de Galicia poderían rexistrarse mínimas de ata -5°C, mentres que as máximas dificilmente superarán os 10°C.
Este Nadal especialmente frío explícase pola presenza dun anticiclón situado sobre Escandinavia e as Illas Británicas, que favorecerá situacións de bloqueo en latitudes altas. Este patrón atmosférico permitirá a entrada de aire frío cara ao sur, afectando a Francia, ao Mediterráneo e ao conxunto da península ibérica, incluída Galicia. Esta información adiantou a previsión semanal do Centro Europeo de Prediccións Meteorolóxicas a Medio Prazo (Ecmwf).
Con todo, aínda que o frio podería facer pensar na neve, dende MeteoGalicia advirten que a súa aparición será máis complicada no noso territorio. As masas de aire continental caracterízanse por seren moi secas, e así chegarían tamén a Galicia. A posibilidade de precipitacións dependería da formación dunha zona de baixas presións que achegase humidade, especialmente á fachada oeste galega e ao norte de Portugal.
Esta situación marcará a tendencia para o que resta de ano, aínda que poderán producirse variacións puntuais segundo factores como a presenza de ceos despexados ou néboas persistentes, que incluso poderían intensificar aínda máis o frío. A esperanza de neve dependerá, unha vez máis, da chegada dun tempo máis inestable, que de producirse podería deixar nevadas a cotas baixas. Un Nadal frío, pero dificilmente branco.
