As altas presións situadas no noroeste das illas británicas son as responsables do tempo seco e frío que está a vivir Galicia nos últimos días de 2025. O prognóstico de distintos servizos de meteoroloxía apunta unhaNoitevella marcada polas baixas temperaturas, as xeadas e as néboas persistentes. Non obstante, o escenario podería cambiar nas primeiras xornadas de 2026. Entre o venres 2 e o sábado 3 prevese a chegada dunha borrasca a Galicia, que traería aire morno e chuvias intermitentes. A partir do domingo a situación podería evolucionar a crista atlántica ou “Atlantic Ridge”, unha configuración atmosférica que favorecería a chegada de baixas presións e aire frío.
Recta final de 2025
Segundo Meteogalicia, dende o luns 29 ata o mércores 31 a situación meteorolóxica estará marcada pola influencia das altas presións, a estabilidade atmosférica, as néboas en zonas de interior e temperaturas que roldarán os 13 graos de máxima e os 5 de mínima, con cambios significativos entre as cidades galegas. O tempo comezará a cambiar en Aninovo, cando xa se prevén ceos moi nubrados, aínda que con ausencia de chuvias en Galicia.
Prognóstico a partir do Aninovo
Será a partir do venres 2 de xaneiro cando se produzan os grandes cambios. Meteogalicia prevé a chegada de frontes atlánticos asociados a unha borrasca situada ao oeste da península. O prognóstico de precipitación apunta a probabilidades de ata o 50% ata o domingo 4. As temperaturas serán máis suaves pola entrada dunha masa de aire morno, que subirá lixeiramente os termómetros en comparación coas xornadas anteriores. De cara á noite e ao día de Reis, o prognóstico está marcado por unha grande incerteza.
O portal Meteored baralla unha situación de crista atlántica ou “Atlantic Ridge” a partir do domingo 4 de xaneiro. É dicir, unha configuración atmosférica que favorecería a entrada de borrascas en Galicia e novas masas de aire frío. Non obstante, aclaran que podería ser un escenario moi complexo, co ascenso das altas presións cara a Islandia e Groenlandia, polo que habería que esperar aos primeiros días do ano para afinar o prognóstico. Dende Meteogalicia prevese que o 5 de xaneiro sexa un día seco, mais cunha baixada brusca das temperaturas.
Seica se di CRISTA. Noraboa pola publicación.