Únete á nosa canle de Whatsapp
Galicia empeza o verán con altas temperaturas. A chegada dunha masa de aire cálido africano disparará os termómetros por riba dos 30 graos dende o xoves ata o domingo. Durante varios días, o país estará baixo a influencia anticiclónica, con néboas no interior e con alternancia de nubes e claros. Meteogalicia indica a posibilidade dalgún orballo no extremo norte e alerta de que o sábado será o día de máis calor. En conxunto, as condicións metereolóxicas que se produciron ao longo desta semana son moi dispares entre si: Galicia empezou o luns con chubascos intensos e rematará coa que se pode consolidar como a primeira onda de calor do ano.
As temperaturas ascenderán ata finais de semana. As previsións en Galicia apuntan a que o sábado poderían superarse os 34 ou 36 graos en zonas de Val do Miño. Durante esta xornada continuarán as altas presións cara o norte da Península, cos ceos practicamente despexados, aínda que no extremo noroeste agárdanse néboas matinais. O domingo as temperaturas experimentarán un leve descenso pero as mínimas continuarán sen cambios. Segundo a previsión de Meteogalicia, este venres, o día de San Xoán, catro das sete grandes cidades acadarán os 30 graos de temperatura. Os termómetros marcarán as temperaturas máis altas na cidade das Burgas, en Ourense. O sábado, os 30 graos superaranse en seis das sete cidades, sendo só A Coruña a que rexistre 27 graos de máxima.
Previsiblemente, a estabilidade atmosférica estenderase ata a próxima semana. Oficialmente chegou o verán despois de varias semanas de baixas presións, e os expertos alertan de que hai que tomar medidas de protección ante o Sol. O tempo cálido e seco será a tónica en toda Península Ibérica. No suroeste peninsular os termómetros poderán marcar os 40 graos e haberá tamén calima. A partir de mediados da semana que vén podería chegar un descenso xeneralizado das temperaturas, uns valores que serían habituais para finais de xuño.
