Unha dorsal anticiclónica está provocando uns días de tempo estable e moi calorosos na comunidade. Esta fin de semana estará marcada pola influencia das altas presións, con todo, unha pequena vagoada provocará algún chuvasco treboento no interior da comunidade. Será a partir do luns cando a situación meteorolóxica dea un xiro radical coa entrada dunha fronte fría asociada a unha borrasca que traerá chuvia, pero non será moi abundante en xeral. As temperaturas caerán ata 10 graos, situándose en valores baixos para a época do ano. Con todo, é probable que se recupere a influencia anticiclónica de cara a finais da semana que vén.
As temperaturas superarán este venres os 30 graos. A entrada de aire frío nas capas altas da atmosfera deixará algo de inestabilidade durante esta xornada, con posibilidade durante a tarde de que se rexistre algún chuvasco treboento no interior da comunidade. O sábado será un día similar, aínda que as precipitacións desprazaranse cara ao leste das provincias de Lugo e Ourense. Ourense, Santiago de Compostela, Lugo e Pontevedra roldarán os 30 graos; Ferrol e A Coruña rexistrarán uns valores máis frescos, con 18 e 17 graos, respectivamente. A xornada comezará con néboas costeiras nas primeiras e últimas horas do día.
MeteoGalicia define o domingo como o “último día desta secuencia de días de influencia anticiclónica sobre Galicia”. Desta maneira, agárdanse bancos de néboa matinais, para dar paso a ceos despexados. As temperaturas empezarán a baixar en todo o territorio galego. Segundo explica eltiempo.com, as altas presións “progresarán cara a península escandinava, comezando un novo patrón de bloqueo”, o que deixa a porta aberta ás borrascas atlánticas.
A partir do luns, unha fronte fría asociada a unha borrasca centrada ó suroeste de Irlanda atravesará Galicia, provocando precipitacións ao longo de todo o día, e movéndose cara ó leste pola tarde. No portal eltiempo.es explican que esta fronte será a “chave que abre a porta a unha masa de aire máis fría que irá deixando precipitación polo norte con maior contundencia”. Como consecuencia, as temperaturas descenderán moderadamente. A probabilidade de chuvia será máis intensa nos primeiros días da semana, e os valores térmicos serán baixos para a época do ano. Todo apunta a que, co avance da semana, a comunidade recuperará a influencia anticiclónica.
