A provincia de Ourense, sobre todo o leste, é o epicentro dunha devastadora vaga de incendios que leva días ameazando núcleos rurais e arrasando todo cando atopa ao seu paso. Na tarde do pasado xoves, a situación complicouse tamén na provincia de Pontevedra. Ás 16:37 horas desatouse un lume no municipio de Vilaboa, na parroquia de Santa Cristina de Cobres. E ás 18:41 horas, outro en Oia, no núcleo de Mougás. Ambos os dous incendios obrigaron a decretar a Situación 2 —en Oia xa foi desactivada a primeira hora desta mañá— como medida preventiva, dado que as chamas estaban moi próximas a dous núcleos e forzaron o desaloxo de máis de medio cento de persoas.
A última actualización da Consellería de Medio Rural contabiliza 50 hectáreas afectadas polo incendio en Vilaboa, que continúa activo. Con todo, o satélite europeo Copernicus estima máis de 300. A principal preocupación é a súa proximidade as casas da zona e, por iso, se decretou o desaloxo de 14 persoas no núcleo de Paradellas. Amais da mobilización de tres técnicos, 10 axentes, 19 brigadas, 19 motobombas, unha pala, unha unidade técnica de apoio, catro helicópteros e oito avións, tamén se desprazaron aos lugares afectados os efectivos a Unidade Militar de Emerxencias (UME).
O lume de Mougás afecta xa a 40 hectáreas. E de igual modo que aconteceu en Vilaboa durante a noite deste xoves, tiveron que desaloxar de maneira preventiva a 45 persoas que se atopaban no cámping de Mougás. A primeira hora desta mañá xa puideran retornar ás instalacións, malia que algunhas delas quedaron aloxadas no cámping de Santa Tecla, na Guarda. Para a extinción do incendio, que continúa activo, mobilizáronse dous técnicos, sete axentes, 11 brigadas, 13 motobombas, unha pala, un helicóptero e dous avións.
Outro foco preocupante en Lugo
Lugo é a segunda provincia máis azoutada pola vaga de lumes que comezou hai dúas semanas, coa xoia do Courel ameazada polas lapas. Este xoves, un novo incendio poñía en alerta a poboación do municipio de Carballedo, na parroquia da Cova. Comezou ás 18.14 horas e decretouse, como nos de Oia e Vilaboa, a Situación 2 pola súa proximidade ao núcleo de Oleiros. De feito, evacuouse de maneira preventiva o Albergue dos Peares. En concreto, a 53 nenos e 11 monitores que foron trasladados ao albergue xuvenil Lug2. Para a extinción do incendio mobilizáronse dous técnicos, sete brigadas, oito motobombas, dúas pas, catro helicópteros e tres avións.
Ourense, a provincia máis afectada
Os grandes lumes desta vaga de incendios están a deixar profundas cicatrices na provincia de Ourense, onde continúan activos cinco focos. Segundo os cálculos da Xunta, o de Chandrexa de Queixa arrasou xa 19.000 hectáreas; o de Oímbra, 17.000; o de A Mezquita, 10.000; o de Larouco-Seadur, 30.000; e o de Carballeda de Valdeorras, 2.600. Non obstante, estes datos difiren dos difundidos polo satélite europeo Copernicus. Mentres que a Xunta estima 76.000 hectáreas queimadas nos catro grandes lumes —cunha superficie arrasada que acade ou supere as 10.000 hectáreas—, Copernicus cífrao en 114.991.
