Galicia arrinca o mes de xullo con tempo estable e caloroso debido á influencia das altas presións situadas sobre os Azores. De cara á segunda metade da semana, non só está previsto que se manteña esta situación, senón que se agarda unha forte subida das temperaturas. Segundo o prognóstico de MeteoGalicia, Ourense chegará aos 35 graos na tarde do venres, en Vigo os termómetros amosarán unha temperatura de ata 31 graos e na zona norte de Galicia roldaranse os 25 graos. Malia estes valores, o organismos galego asegura que Galicia non estará afectada pola onda de calor que si prevé o modelo francés ARPEGE (Action de Recherche Petite Echelle Grande Echelle) para o suroeste da península e que se prolongará, como mínimo, ata o sábado.
A definición de onda de calor non é absoluta, xa que depende do país e das institucións. Para a Axencia Estatal de Meteoroloxía (AEMET), son episodios cunha duración mínima de tres días, nos cales as temperaturas máximas están por enriba das máximas diarias dos meses de xullo e agosto rexistradas dende o ano 1971 ata o 2000 nunha mesma rexión.
Pese a non agardarse un aviso amarelo no sur do territorio galego (para o cal é preciso que se rexistren temperaturas de máis de 36 graos), esta zona enfrontarase a altas temperaturas de cara á fin de semana, chegando a máximas de 35 graos no interior da provincia de Ourense e superando os 30 graos en varios puntos das Rías Baixas. No caso de Verín, a AEMET prognostica unha temperatura de ata 37 graos. Doutra banda, na costa do norte de Galicia agárdanse valores moito máis tépedos, roldando os 25 graos.
A onda de calor de 2022
O norte da península ibérica leva anos afectado por unhas ondas de calor cada vez máis recorrentes e intensas. Estes episodios non só afectan á contorna e ao medio ambiente, xa que son motivo de enfermidade e ata falecemento na poboación humana e noutras especies: o ano pasado, a calor causou ata 63 mortes en Galicia, sendo os maiores de 85 anos e as mulleres as persoas máis afectadas.
No verán do 2022 produciuse unha onda de calor que os modelos preditivos dos distintos organismos de control meteorolóxico non previran, e que afectou durante un período moi prolongado a unha ampla rexión do continente europeo, incluíndo España, Portugal, Francia e Inglaterra. Na localidade ourensá de Leiro, os termómetros chegaron a marcar 44,2 graos, convertendo o verán dese ano no máis cálido de Galicia dende o 1961.
