Un equipo de Ourense define as mellores rutas para instalar aeroportos de drons

O grupo Aerolab está creando unha ferramenta computacional baseándose en datos xeoespaciais, meteorolóxicos e de simulación de dinámica de fluídos

O grupo de investigación Aerolab, no Campus de Ourense e vinculado á Universidade de Vigo (UVigo), traballa, no marco dun proxecto estatal, na creación dunha ferramenta computacional que, baseándose en datos xeoespaciais, meteorolóxicos e de simulación de fluídos, definirá as rutas máis seguras e eficientes para un vertiporto en cidade. É dicir, para un aeroporto de drons urbano.

O proxecto ten unha duración de dous anos e está previsto que remate en decembro de 2025. Está financiado con 121.000 euros pola convocatoria Proxectos de Xeración de Coñecemento, do Ministerio de Ciencia e Innovación, e o Fondo Europeo de Desenvolvemento Rexional-Next Generation EU. Como investigadores principais están os catedráticos UVigo Elena Martín e Higinio González. O enfoque do proxecto é multidisciplinar, combinando persoal investigador con experiencia en sistemas aéreos non tripulados e tecnoloxía xeoespacial (Higinio González, Iván Puente e Luis Miguel González), en modelos meteorolóxicos (Nieves Lorenzo e Inés Álvarez) e aerodinámica, mecánica de fluídos computacional e modelado de orde reducido (Elena Martín).

Publicidade

Na actualidade, no sector en auxe dos drons, a tendencia é optar pola construción dos chamados vertiportos. É dicir, infraestruturas enerxeticamente eficientes pensadas para integrarse na cidade e permitir operacións áxiles e seguras deste tipo de aeronaves. “Os vertiportos achegarán un novo modelo de conectividade urbana”, sinalan. Neste contexto, o obxectivo xeral de Safe-Vertiport é “contribuír a garantir a seguridade e a eficiencia de manobras de aterraxe e despegue de aeronaves en emprazamentos de vertiportos urbanos”.

As rutas máis seguras e eficientes

Concretamente, Safe-Vertiport traballa no desenvolvemento de algoritmos para a definición de rutas de aterraxe e despegue baseadas en información xeométrica combinada, predicións micrometeorolóxicas-CFD, restricións reguladoras e a envolvente de voo dunha aeronave. O algoritmo de planificación que se persegue, baseándose nunha combinación de factores derivados da información anterior, ofrecerá un espazo aéreo “voxelizado”, indicando se cada vóxel (cada unidade cúbica del), é apto para ser utilizado pola aeronave ou non, definindo así en primeiro lugar o camiño máis seguro para ela e, en segundo lugar, o máis eficiente en tempo e enerxía consumida.

Publicidade

O proxecto aposta pola aplicación de tecnoloxías como modelado xeoespacial 3D; de simulación CFD de fluxos de aire e de microclima. A xeración e implementación dos diferentes modelos emprega ferramentas de balde e de código aberto. A validación da proposta desenvolvida realízase en parte empregando equipos da Escola de Enxeñaría Aeronáutica e do Espazo do campus de Ourense á que pertence o equipo investigador.

Finalmente, Safe-Vertiport desenvolverá “unha ferramenta dinámica que resolverá, con predicións rápidas, o fluxo no vertiporto a escalas da orde de metros utilizando software CFD”. Deste xeito, o proxecto achegará tres novidades ao seu ámbito de traballo. O primeiro, o uso de condicións de contorna máis realistas e precisas. Segundo, a implementación dun rápido modelo de predición de fluxos de vento en resolución de metros. E, finalmente, a súa alimentación a partir da lectura dinámica de predicións meteorolóxicas.


Podes ler a noticia completa do DUVI na seguinte ligazón.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Un investigador da UVigo axuda a resolver un dos enigmas dos ciclos das idades de xeo

O achado, que emprega unha técnica analítica que permite datar rexistros paleoclimáticos ata hai 600.000 anos, axudará a prognosticar con maior precisión o clima futuro

A UVigo emprega plantas trampa para loitar contra unha praga nas patacas

A 'Solanum sisymbriifolium' é capaz de enganar ao nematodo que ataca ao tubérculo causando a súa morte

A UVigo amplía a oferta académica co primeiro grao con mención dual de Galicia

O mércores 19 ábrese a preinscrición para as titulacións, que inclúen cinco Programas Académicos con Percorridos Sucesivos

O ciclo do sal nos océanos e o seu impacto no colapso da AMOC

Se o bucle de circulación Atlántico daría lugar a un arrefriado brusco do clima europeo