Únete á nosa canle de Whatsapp
As verteduras ao mar por pellets non son algo novo. De feito, ocorren dende a década dos 70. O accidente medioambiental ocorrido por Toconao, que está a deixar imaxes impactantes nas costas galegas, é un dos moitos que tiveron lugar no mundo. A organización Fauna & Flora International emitiu un informe onde recolle os oito maiores accidentes con pellets que acarrexaron grandes consecuencias medioambientais, co obxectivo de retratar a súa contaminación para a toma de medidas por parte da Organización Marítima Internacional (OMI). A perda de granulados do mar, sinalan, ocorre de maneira “continua” nas diversas etapas de manipulación, transporte e fabricación. En 2019 produxéronse 460 millóns de toneladas deste plásticos e en 2040 agárdase que se produzan 540. Estes desastres ambientais verteron aos océanos, en total, 2070 toneladas de bólas.
Todas estas verteduras están relacionadas con accidentes ou fenómenos climáticos adversos e o resultado é común a todos: “contaminación por pellets xeneralizada e altamente daniña e operacións de limpeza custosas, lentas e ineficaces”, apunta a organización Fauna & Flora International no seu estudo.
O X-Press Pearl e a “morte” dos mares
Foi definido como o maior desastre ambiental do país. En 2021, o buque X-Press Pearl afundiuse cos contedores que transportaba fronte á costa de Colombo, en Sri Lanka. En total, foron 1.485 toneladas de materiais esparexados polo mar: 25 de ácito nítrico, hidróxido de sodio e ademais doutras substancias químicas e tamén cosméticos; 300 toneladas de combustible; e 28 contedores de gránulos de plástico. Antes de afundir, o barco incendiouse durante días. Por aquel entón falouse da “morte” dos mares que rodeaban a illa. As autoridades ceilandesas prohibiran á poboación tocar os residuos derivados do accidente pola súa toxicidade, así como a actividade pesqueira nun radio de 50 millas do barco.
49 toneladas de pellets perdidos en Sudáfrica
Dous portacontedores chocaron no porto de Durban, en Sudáfrica, durante unha tormenta en 2017, derramando toneladas de pellets. Chegaron a atoparse en Australia, movidos polas correntes mariñas, a 3.000 quilómetros do lugar. En total, calcúlase a perda de 49 toneladas de perdigóns por mor dunhas condicións meteorolóxicas que tamén afectaron a outros barcos, como o MSC Susanna, que transportaba perdigóns. “A falta de coñecemento sobre a mellor maneira de conter os derrames de pellets no mar e a ausencia dunha resposta planificada contribuíron a que se estenderan ao longo de miles de quilómetros dende Cidade do Cabo ata a costa de Australia Occidental, apunta o informe. As autoridades informaron que só se puideron recuperar menos do 25% da carga do buque.
Tres anos despois, en outubro de 2020, empezaron a chegar granulados ás praias de Cidade do Cabo ata Porth Elizabeth, no Cabo Oriental de Sudáfrica, e crese que proveñen dun buque de carga que perdeu contedores a principios dese ano. Non existen datos oficiais sobre as verteduras.
Nova Orleans, 2020
O cargueiro CMA CGM Bianca esparexeu millóns de perdigóns no río Mississippi debido a un accidente durante a descarga en Nova Orleans. Tivo lugar o 20 de agosto e un contedor con 25 toneladas de bólas de plástico que eran transportadas dende Asia caeron do buque, máis dun billón de pellets perdidos. Estendéronse cara o Golfo de México e cara as praias da illa de Elmer. As praias e beiras do río de Luisiana tamén se encheron de granulados.
Noruega, pioneira da regulación tras un vertido en 2020
O 23 de febreiro de 2020, un contedor transportado polo buque MV Trans Carrier perdeu 13,2 toneladas de pellets plásticos fronte á baía de Alemaña das 26 que transportaba camiño a Noruega. Unha tormenta noctura foi a culpable desta catástrofe, iso si, o barco quedou intacto. En total, calcúlase que foron 650 millóns de pellets os que contaminaron nunha gran área da costa oeste de Suecia cara o sur de Noruega. Segundo indica o informe, este foi o segundo incidente de contaminación por pellets que afectou ás nacións europeas que bordean o Mar do Norte. Noruega foi un dos países pioneiros en impulsar a regulación para o transporte marítimo de pellets despois deste acontecemento.
O MSC Zoe, o maior barco transportador
En xaneiro de 2019, o gran buque MSC Zoe transitaba polo Mar do Norte fronte ás costas holandesas. A tormenta Zeetje provocou ondas de 10 metros e moveron tanto o barco que terminou por perder 345 contedores, onde se incluían todo tipo de químicos tóxicos, pellets, electrodomésticos, mobiliario ou roupa. As consecuencias non tardaron en facerse visibles nas illas e a costa da rexión de Mar de Wadden, unha zona de Patrimonio Mundial. Segundo o informe de Fauna & Flora Internacional, perdéronse 550 millóns de granulados que chegaron ás illas dos Países Baixos. O MSC Zoe fora bautizado como o “maior barco transportador” de contedores polos seus 395,40 metros de eslora e a súa capacidade para transportar 19.224 contedores.
O naufraxio do MV Rena
Foi calificado como o peor accidente marítimo da historia de Nova Zelandia. O buque MV Rena encallara fronte as súas costas e partiu en dous o 8 de xaneiro de 2012 debido aos golpes constantes das rachas de vento e os temporais marítimos. A uns 12 quilómetros da cidade portuaria de Tauranga, centos de toneladas de combustible espalláronse. Isto ocasionou tamén o desprendemento dunha cantidade estimada de 150 toneladas de pellets ao mar. O accidente provocou a morte de máis de 20.000 aves mariñas, nunha contorna de elevada diversidade biolóxica. O domingo 9 de outubro, unha enorme mancha de petróleo de cinco quilómetros tinguiuse sobre o mar ameazando calquera tipo de vida mariña. En total, o barco transportaba 1.368 contedores con 1.700 toneladas de fuel e 200 toneladas de diésel mariño, ademais de máis materiais perigosos.
O tifón Vincent e as 150 toneladas de pellets en Hong Kong
En 2012, apunta o informe de Fauna & Flora Internacional, derramáronse aproximadamente 7.500 millóns de pellets, unhas 150 toneladas no porto de Hong Kong dun barco sen nome. As condicións meteorolóxicas ocasionadas polo tifón Vincent, provocaron a caída dos contenedores que portaba o barco, concretamente seis. As bólas de plástico esparexéronse polo mar e comezaron a chegar a terra. Os voluntarios puxéronse mans á obra mais, “a ausencia de protocolos estandarizados de resposta a desastres ou dunha metodoloxía de limpeza fixo que dependeran de calquera ferramenta que estivera á súa disposición para limpar o derrame”, apunta a organización no documento.
caca