Xoves 28 Marzo 2024

O incendio de Ribas de Sil afectou ao sinclinal de Castro Dares, no xeoparque do Courel

Este pregamento é un dos lugares de interese dentro do parque recoñecido pola UNESCO polo gran valor xeolóxico que acolle

Unha vez controlados os dous incendios, moi próximos entre si, que afectaron a comezos de semana aos concellos de Ribas de Sil, A Pobra do Brollón e Quiroga, é momento da avaliación dos danos na superficie danada polo lume, que as estimacións sitúan arredor de 1.700 hectáreas. Ademais do risco que supuxo para algúns núcleos de poboación na ribeira dos ríos Sil e Lor, as lapas afectaron a parte da Rede Natura dentro do LIC Ancares-Courel e, ademais, a un dos enclaves catalogados dentro do xeoparque da UNESCO Montañas do Courel, o único existente en Galicia.

Así, ardeu parte da vexetación que cobre o sinclinal de Castro Dares, segundo recolle este venres La Voz de Galicia. Un dos membros do comité científico do xeoparque, Daniel Ballesteros, explica que as altas temperaturas xeradas polo lume “poden causar cambios químicos na composición das rochas”, degradándoas e facilitando a súa descomposición, polo que se poderían producir desprendementos no enclave. Do mesmo xeito, os incendios afectaron aos restos das minas de ouro romanas de Margaride de Lor, uns depósitos erosivos en Quintá de Lor e outros elementos patrimoniais catalogados en Rairos, Barreiro, O Penedo ou Riquisande. Ballesteros apunta que, por agora, non se puido comprobar con detalle se houbo danos reais no pregamento, pero incide na preocupación polas “alteracións do patrimonio xeolóxico que puido provocar o incendio neste e outros puntos do xeoparque.

Publicidade

Castro Dares, un lugar de interese xeolóxico

O enclave de Castro Dares sitúase fronte ao lugar de Nogueira (Ribas de Sil) e a N-120, que están na outra beira do Sil, e esténdese monte arriba desde a vía do tren entre Monforte e Ponferrada. O Instituto Geológico y Minero de España (IGME) cataloga este pregamento de capas de cuarcita do Ordovícico como un dos lugares de interese xeolóxico (LIG) na zona, destacando que é unha “interferencia de dobramentos das dúas fases hercínicas de deformación, que son facilmente observables na aba norte do val do Sil”. O seu nome evidencia, ademais, a existencia de asentamentos prehistóricos, xa que desde o cumio do monte disponse dunha ampla panorámica da contorna.

O pregamento de Castro Dares pode contemplarse desde un dos xeomiradoiros que compoñen o xeoparque, tal e como destaca o organismo xestor do mesmo.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Cales foron as causas da seca que precedeu aos incendios de Australia? Un equipo de Ourense ten a clave

A investigadora Milica Stojanovic, do grupo EphysLab da UVigo, centrou o seu traballo en analizar as fontes de humidade da zona

As cinzas dos lumes de 2017 poden causar alteracións no plancto costeiro da Vigo

O estudo realizado por investigadores do CIM da Universidade de Vigo centra a súa investigación na escorredura posterior ás queimas

Así devastan os incendios a paisaxe: un estudo revela o seu efecto nos ecosistemas galegos

A tese de Sheila F. Riveiro demostra que o lume favorece as especies exóticas invasoras e despraza as nativas nos montes de Galicia e Portugal

Un Google Earth en tempo real: así é o software galego para actuar ante as emerxencias

A empresa Beagle Technologies usa a tecnoloxía 3D para crear cartografías do terreo o máis completas posible e facilitar a toma de decisións