O inverno meteorolóxico empezou este pasado día 1 e comezará a notarse durante esta ponte de decembro en Galicia. As axencias meteorolóxicas sinalan que un anticiclón situado no arquipélago das Azores deixará a súa influencia sobre o territorio galego durante esta semana e os días festivos, mais aínda así as chuvias e as baixas temperaturas chegarán e, de cara ao domingo, xeadas fortes farán acto de presenza no interior da comunidade.
Se ben toda esta semana o territorio estará influenciado polo anticiclón das Azores, os ventos do suroeste farán que de cara ao venres as masas de aire húmidas deixarán ceos con máis nubes e un tempo húmido, “con posibilidade de chuvias febles na franxa atlántica de cara á noite”, segundo indica Meteogalicia. No interior os refachos serán frouxos, aumentando a súa intensidade no litoral e, sobre todo, no extremo norte.
Xa de cara ao sábado, unha fronte cruzará Galicia deixando chuvias durante a mañá e facendo que comece a notarse o aire frío procedente do Atlántico norte. As temperaturas comezarán a baixar, sobre todo de cara ao domingo. Pasando dos 12 graos de máxima do sábado aos 8 graos no domingo en cidades como Lugo ou de 14 a 10 graos en Ourense.
Durante a xornada do día 8, o anticiclón das Azores subirá en altitude e un fluxo do norte arrastrará unha masa de aire moi frío continental que fará que as temperaturas baixen de forma considerable, tanto as máximas como as mínimas. Será a partir deste día e de cara á próxima semana, cando comecen a darse as primeiras xeadas importantes, sobre todo no interior de Galicia. Segundo indican dende Meteogalicia, existen probabilidades de que neses días se poidan dar nevadas no territorio galego.
