O vento segue a transportar as partículas do fume dos incendios dende Portugal cara Galicia, deixando uns ceos escuros e causando un efecto óptico que outorga ao Sol unha cor vermella intensa. Dende hai días, distintas localidades galegas amencen con estes tons, causando unhas incribles imaxes mais, tamén, unha alerta: a calidade do aire en cidades como Vigo é entre mala e moi mala, dependendo do punto.
Na tarde de xoves, o usuario de X David Couce aproveitou para inmortalizar coa súa cámara dito fenómeno e a súa influencia sobre a Torre de Hércules na Coruña. Na terceira imaxe pódense apreciar as manchas solares, mais trátase dunha fotografía feita cun filtro solar homologado, o cal permite apreciar estas rexións do astro que se atopan a unha menor temperatura que o resto. Iso si, cando as hai: non sempre ocurre.
As redes inúndase dos testemuños de galegos e galegos que non queren perder a ocasión de inmortalizar este ton vermello. Isto ocorre porque as partículas de monóxido de carbono liberadas nos lumes forestais estanse movendo cara o norte e o noreste da Península Ibérica. De feito, na tarde do martes Copernicus Sentinel xa anunciaba este transporte masivo de fume, cuxo punto máximo acadarase nesta xornada de venres. Malia que o espectáculo do ceo poida chamar a atención, é recomendable tomar as precaucións pertinentes e ter en conta as alertas pola mala calidade do aire emitidas por MeteoGalicia.
