O incendio forestal que comezou o luns á noite a carón do comezo da ría de Arousa, preto de Bexo (Dodro) e se propagou de madrugada a Rianxo, é o maior que se produce en Galicia desde o desastre de outubro de 2017, cando arderon decenas de miles de hectáreas nunha soa fin de semana. Os últimos datos da Xunta, cando se anunciou a extinción do lume, estiman que arderon 1.162 hectáreas, 1.092 de monte arborado e 70 de raso.
A superficie afectada polo incendio, moi próxima a autoestrada e na súa maior parte dominada por unha masa mesta de eucaliptos e piñeiros, foi aumentado rapidamente co paso das horas do martes, debido á refachos de nordés que superaron os 60 km/h.
O incendio comezou o luns pasadas as 20 horas, e segundo declarou esta tarde a Europa Press o vicepresidente da Xunta, Alfonso Rueda, nunha visita a Rianxo, ten como causa “bastante probable” unha faísca que se desprendeu dunha torre de alta tensión. Unha posibilidade que tamén apunta a comunidade de montes Cruz do Avelán, segundo recolle La Voz de Galicia.
O avance das lapas provocou que se tomaran diversas medidas de precaución ao longo do día. Así, ás 12 do mediodía declarouse a situación pola proximidade ás vivendas no núcleo de Meiquiz, en Rianxo. Temporalmente estiveron tamén cortadas a autovía do Barbanza, que discorre entre as zonas máis afectados polo incendio, e a AC-305, que une Padrón e Ribeira. Do mesmo xeito, aínda que o lume non estaba moi preto, desaloxáronse polo fume o instituto Félix Muriel e a escola unitaria de Rañó.
Foi precisamente a columna de fume, empurrada cara ao Atlántico polo vento do nordés, o que propiciou que os sinais do incendio se viran desde bastantes quilómetros de distancia. E mesmo desde o espazo, xa que o satélite Terra da NASA retratou a gran fumareda.
Incendios no Barbanza, As Pontes e Ourense
Non en tanto, o de Dodro e Rianxo non foi o único incendio que se produciu o martes na zona do Barbanza. Ás 20 horas quedaban extinguidos dous focos, moi próximos entre si, que queimaron 77 hectáreas nas parroquias de Argalo (Noia) e Tállara (Lousame).
EXTINGUIDOS os #IFTállaraLousame e o #IFArgaloNoia. A superficie afectada entre os dous foi de 77 hectáreas, das cales 71 foron de monte arborado e 6 de monte raso.
— incendios 085 (@incendios085) 26 de marzo de 2019
Ás 13 horas quedou controlado o incendio no municipio coruñés das Pontes de García Rodríguez, na parroquia do Freixo, que segundo as últimas estimacións afectou unha superficie de arredor de 15 hectáreas de monte raso.
Cara as últimas horas do martes, a preocupación trasladouse tamén a Ourense, onde varias fontes daban conta de varios incendios que se iniciaron en lugares como Santigoso (O Barco de Valdeorras) e Queizás (Verín).
ACTIVO un lume con dous focos no concello do Barco de Valdeorras, parroquia de Santigoso, que afecta unha superficie de máis de 20 hectáreas. #IFSantigosoOBarco
— incendios 085 (@incendios085) 26 de marzo de 2019
