Que as candorcas entren na ría de Arousa non é novo: o ano pasado, un grupo de Orcinus orca achegouse á zona, sorprendendo aos veciños e aos visitantes, mais non á comunidade científica. Aínda que a meirande das veces estes cetáceos divísanse en augas exteriores, existe documentación histórica do século XIX onde xa se rexistraba a entradas das candorcas no interior das rías galegas. Aínda así, a chegada destes animais soe traer a inquedanza da poboación. No caso de onte, catro candorcas apareceron na ría de Arousa na tarde: segundo informan o Grupo de Traballo Orca Ibérica-GTOA e a CEMMA, estes exemplares correspóndense coa avoa Toñi, a matriarca do grupo, o macho Pingu, e as femias Gnomo e Gladis Estrela.
Durante un programa de observación de aves mariñas, Kari Korhonen tomou a bordo do barco Chasula as imaxes que axudaron a identificalos. Segundo informan dende GTOA e CEMMA, só Gladis podería ter algunha interacción coas embarcacións do arredor, mais “en compañía dos outros tres exemplares seguramente non actúe”. En canto aos reportes de interaccións xa notificados na ría, a Coordinadora e o Grupo de Traballo subliñan que o máis seguro é que foran provocadas “por outros exemplares dispersos pertencentes ao grupo, que aínda non foron identificados”.
Segundo explicaba o ano pasado a GCiencia o investigador do Bottlenose Dolphin Research Institute (BDRI) Bruno Díaz, “a entrada da ría de Arousa é moi profunda e as especies peláxicas, como o golfiño común (Delphinus delphis), entran todos os anos polo canal. Fano ocasionalmente ao final do verán, que é cando entra máis peixe”. As candorcas poderían ter un comportamento semellante. Aínda así, a presenza das candorcas nas rías ou nas zonas costeiras máis pobladas polo ser humano adoita ser breve.
Unha menor interacción este ano
Este 2024, as candorcas chegaron á costa galega na segunda quincena de agosto. Primero, na ría de Arousa, e despois, na de Vigo, na baía de Baiona e nas Illas Cíes. A costa do atlántico é parte do seu percorrido natural, que ten como punto de inicio o estreito de Xibraltar e como lugar de destino o golfo de Biscaia. Aínda así, segundo GTOA e a CEMMA, este ano as candorcas estarían limitando as interaccións coas embarcacións e mudando o seu comportamento.
Segundo as observacións da Coordinadora e do Grupo de Traballo Orca-Atlántica, este ano as embarcacións modificaron as súas zonas de paso, achegándose máis cara a costa e o literal e evitando as augas máis profundas, onde adoita atoparse o animal. Isto, sumado a que as candorcas estiveron este ano máis dispersas e cun maior movemento xeográfico, motivou a redución na frecuencias das interaccións.
