Que calidade do aire ten o teu concello? Compróbao en tempo real nesta aplicación

Talvez te preguntes con certa recorrencia se a calidade do aire que respiras é boa. A resposta a esta pregunta intermitente é ben doada grazas á nova ferramenta que acaba de lanzar o Ministerio para a Transición Ecolóxica e o Reto Demográfico (Miteco). A súa nova aplicación permite consultar en tempo real o índice de calidade do aire segundo as medicións recollidas polas diferentes estacións da rede nacional de vixilancia. Tamén se poden consultar datos sobre Galicia, con arredor de 50 puntos de control repartidos por todo o territorio. Segundo os datos consultados esta mañá, a calidade do aire en todas as estacións galegas era “boa” ou razoablemente boa”. O mala do Miteco conta coa colaboración do Ministerio para a Transformación Dixital e a Función Pública.

Datos por estacións

Máis en detalle, a estación de Laza, en Ourense, marcaba esta mañá unha “boa” calidade do aire. Unha vez que se clica nela, aparece un despregable con información detallada sobre as medicións. O primeiro deles é un gráfico onde se indica o nivel de contaminantes por hora. En función das concentracións de cada un, o ministerio emite unha serie de recomendacións á poboación que, neste caso, non son necesarias. A continuación, indica a concentración segundo o tipo de contaminante, tendo en conta cinco: o ozono troposférico (O₃), as partículas PM_2,5 e PM₁₀, o dióxido de xofre (SO₂) e o dióxido de nitróxeno (NO₂). Un último gráfico indica a calidade do aire da estación nos últimos 368 días. En Laza, o 78% foi razoablemente boa, o 20% boa e o 2% regular.

Publicidade

No caso da estación de Campelo, en Pontevedra, a calidade do aire era “razoablemente boa” esta mañá. Segundo a aplicación, isto debíase a uns maiores niveis de ozono trosposférico, relativamente elevados dende as primeiras horas da madrugada. Malia que o ministerio non emite ningún tipo de recomendación específica á poboación, explica que os niveis elevados de O₃ son “un problema xeneralizado” tanto en España como no sur de Europa debido á elevada insolación. Iso si, os niveis adoitan ser inferiores no norte que no sur.