O fume dos incendios forestais que asolan Canadá está chegando a Galicia e xa pode apreciarse nos ceos. As concentracións destas partículas sitúanse na capa alta da atmosfera e de momento, Meteogalicia informa de que a calidade do aire en superficie é boa. Co cal, estes contaminantes non constitúen un perigo para a saúde das persoas. O luns e o martes serán os días con máis concentracións de fume e a masa de aire disiparase de cara a xornada do mércores.
Meteogalicia informou a última hora do domingo da chegada do fume dos lumes que levan semanas calcinando Canadá. “Na imaxe do satélite pódese distinguir, ademáis das nubes de tormenta sobre a Península e as brétemas costeiras do Cantábrico, unha banda entrando polo noroeste de Galicia. Trátase de fume con orixe nos incendios de Canadá”, afirmou. E é que os ceos de Galicia deberían contemplarse completamente azuis, con todo, están tinguidos dun ton grisáceo.
Esta masa de fume provén das máis de 5,2 millóns de hectáreas queimadas en Canadá, segundos os últimos datos aportados polo país, con máis de 400 focos repartidos en diferentes puntos e unhas 32.000 persoas evacuadas. Dende o comezo deste desastre medioambiental, os lumes deixaron imaxes tan impactantes como os ceos laranxas de Nova York. Meteogalicia explica que “o fume eleva nubes moi altas que dispensan pouca luz, a modo de calixe. É un ambiente turbio en niveis altos da atmosfera que non depositan partículas en superficie”.
A estabilidade atmosférica asentouse en Galicia dende o pasado 21 de xuño co comezo do verán e nestes momentos o ceo está limpo de nubes no 90% do territorio. Con todo, os expertos informaron hai días da posible chegada das partículas dos lumes de Canadá. Dende AEMET Galicia afirman que o fenómeno aparece a modo de “banda nubrada de aspecto difuso”. En Meteogalicia non identificaron ningunha alteración na calidade do aire dende a súa aparición, só o sábado, mais tivo a súa orixe nas fogueiras de San Xoán a noite anterior.
