A Estatua da Liberdade, o monumento máis icónico de Nova York, apenas se pode ver a simple vista. Toda a cidade, ao igual que outros puntos da costa este dos Estados Unidos, está tinguida de laranxa. O responsable é o fume dos incendios forestais de Canadá, onde hai máis de 400 focos activos e onde xa se queimaron este ano catro millóns de hectáreas. Un desastre ambiental que viaxa máis de 1.000 quilómetros ata afectar cunha néboa espesa e alaranxada a cidade de Nova York.
Segundo explican dende a Axencia Estatal de Meteoroloxía (AEMET), dende onde se fixeron eco do acontecido, os aerosois que emite a queima da masa forestal de Canadá dispersan a luz aínda máis, o que fai que cambie a cor do ceo e pase a ser un ton máis alaranxado. Ademais, o vento despraza estes aerosois a varios puntos de Estados Unidos, afectando a gran parte da costa este do país. Así de ve na seguinte imaxe:
Amais disto, a AEMET alerta de que o efecto non só é visual, senón que a mala calidade do aire tamén afecta á saúde. O goberno do estado de Nova Jersey pediu ás persoas vulnerables, incluídos anciáns e nenos, que limiten a súa exposición ás partículas que están a flotar no ambiente. Así mesmo, que se restrinxan ao máximo posible as actividades en exteriores.
A continuación, algúns vídeos e imaxes do catastrófico escenario:
Imaxe da ponte de George Washington entre Nova York e Nova Jersey.
