Un calor abafante. Ese é un resumo sucinto do que acontecerá nas próximas 48 horas en Valdeorras e na zona colindante ao Miño nas provincias de Pontevedra e Ourense. A responsable será a entrada dunha masa de aire cálido procedente do sur peninsular que activa a alerta amarela por temperaturas de ata 36 graos e tormentas entre martes e mércores. A partir de mediados de semana, e debido a unha bolsa de aire frío en altura, producirase un considerable alivio térmico e as temperaturas caerán por debaixo dos 26 graos. Non obstante, algunhas partes de Galicia vivirán 48 horas de moita calor.
Os avisos amarelos están activos este luns por máximas de ata 34 graos en 13 concellos pontevedreses: A Guarda, O Rosal, Tomiño, Tui, Salceda de Caselas, O Porriño, Salvaterra de Miño, Ponteareas, As Neves, Mondariz, Mondariz-Balneario, Arbo e Crecente. A alerta permanecerá acendida entre as 15 e as 21 horas.
No que respecta á provincia de Ourense, este luns haberá dúas zonas afectadas. En Valdeorras serán cinco concellos en aviso por calor: Rubiá, O Barco de Valdeorras, Vilamartín de Valdeorras, A Rúa, Petín e Larouco. No Miño de Ourense son 21 municipios: Padrenda, Pontedeva, A Arnoia, Cartelle, Cortegada, Melón, Carballeda de Avia, Leiro, Beade, Cenlle, San Amaro, Punxín, Ourense, O Pereiro de Aguiar, Nogueira de Ramuín, San Cibrao das Viñas, Taboadela, Barbadás, Castrelo de Miño, Toén e Ribadavia.
Amais de Pontevedra e Ourense, a alerta amarela permanecerá activa este luns por vento no mar no noroeste da Coruña.
Da calor ás tormentas
O martes chegará a inestabilidade atmosférica, que traducirá a intensa calor do luns en fortes treboadas, sobre todo de madrugada, en distintos puntos de Galicia. A alerta amarela permanecerá activa en Ourense por temperaturas superiores aos 36 graos entre as 15 e as 21 horas do martes. Haberá 21 concellos afectados, os mesmos que o día anterior.
Na provincia de Pontevedra estará activo o aviso amarelo entre as 21 e as 24 horas por tormentas e chuvias localmente fortes. Serán 35 concellos afectados: A Guarda, O Rosal, Oia, Tomiño, Baiona, Gondomar, Tui, Nigrán, Vigo, Mos, O Porriño, Salceda de Caselas, Salvaterra de Miño, As Neves, Arbo, Crecente, Ponteareas, Mondariz, Mondariz-Balneario, Pazos de Borbén, Redondela, Soutomaior, Ponte Caldelas, Pontevedra, Vilaboa, Marín, Moaña, Cangas, Bueu, Barro, Portas, Caldas de Reis, Valga, Pontecesures, Catoira, Vilagarcía de Arousa, Vilanova de Arousa, A Illa de Arousa, Cambados, Ribadumia, Meis, Poio, Meaño, Sanxenxo e O Grove.
Madrugada de treboadas
O mércores será un día marcado pola inestabilidade atmosférica debido a unha bolsa de aire frío en altura que se situará ao oeste de Galicia. Produciranse fortes treboadas durante a madrugada, co aviso amarelo activado ata as 6 horas. As zonas afectadas serán o suroeste e o oeste da Coruña, con 22 concellos: Camariñas, Vimianzo, Zas, Muxía, Dumbría, Mazaricos, Outes, Muros, Carnota, Corcubión, Cee, Fisterra, Noia, Lousame, Rois, Padrón, Dodro, Rianxo, Boiro, Porto do Son, A Pobra do Caramiñal, Ribeira.
Tamén estará acendida a alerta no litoral e no Miño de Pontevedra, zonas que abranguen 44 concellos: Pontecesures, Valga, Catoira, Caldas de Reis, Portas, Barro, Pontevedra, Pontecaldelas, Soutomaior, Pazos de Borbén, Mondariz, Mondariz-Balneario, Crecente, Arbo, As Neves, Salvaterra de Miño, Ponteareas, Redondela, Vigo, Mos, O Porriño, Nigrán, Gondomar, Tui, Oia, Tomiño, Baiona, O Rosal, A Guarda, Vilaboa, Moaña, Marín, Cangas, Bueu, Vilagarcía de Arousa, Vilanova de Arousa, A Illa de Arousa, Ribadumia, Meis, Meaño, Cambados, O Grove, Sanxenxo e Poio.
Segundo informa Meteogalicia, o xoves haberá unha fronte pouco activa preto de Galicia e, polo tanto, agárdanse chuvascos no oeste e temperaturas que roldarán os 23 graos en todas as cidades galegas. O venres rexistraranse precipitacións na fachada atlántica e a partir da fin de semana recuperarase a influencia anticiclónica e os días estarán marcados polo tempo seco e solleiro. As temperaturas irán aumentando de forma progresiva a partir do domingo.
