Os ceos anubrados e as chuvias febles serán as indiscutibles protagonistas durante as xornadas de venres e sábado. Con máximas que non superarán os 20 graos nas cidades galegas agás en Ourense, con máis de seis graos por enriba, non serán días de praia. Non obstante, a inestabilidade dos primeiros días da fin de semana durará pouco. O domingo agárdase unha entrada de aire moi cálido procedente do norte de África, impulsada por unha DINA situada entre os Azores e Madeira, que provocará unha drástica subida dos termómetros. Ourense chegará aos 36 graos o luns e ningunha das máximas das cidades galegas baixará dos 26.
A configuración atmosférica propiciará 72 horas de moita calor en Galicia e no resto da península. Dende o xoves, unha dorsal anticiclónica situada sobre España é a responsable do tempo estable, malia que a entrada dunha fronte pouco activa traia chuvascos illados ao noroeste. Mais o fenómeno no que hai que poñer a atención e á formación dunha DINA no Atlántico subtropical que se situará entre as illas de Madeira e Azores durante a fin de semana. Ela será quen impulse unha masa de aire moi cálido procedente do norte de África que disparará os termómetros na península.
Non obstante, o seu movemento cara a Portugal vai propiciar cambios atmosféricos. En función de como se desprace, é probable que xere un novo episodio de fortes tormentas e, en consecuencia, se produza un alivio térmico, sobre todo a partir do mércores. De feito, así o indica o prognóstico de Meteogalicia. “Volverá a inestabilidade pola presenza de aire frío en altura que propiciará situacións de tormenta”, indican. As probabilidades de precipitación situaranse dende mércores ata venres entre un 50% e un 65%. E as temperaturas tamén experimentarán un descenso tan significativo como progresivo co avance da semana.
