A empresa Megasa Siderúrxica, situada en Narón, detectou o 8 de xuño unha fuga dunha fonte radioactiva de Cesio-137 nun forno de arco eléctrico destinado á produción de aceiro. Seguindo o procedemento, a empresa comunicou ao Consello de Seguridade Nuclear (CSN) o acontecido. Esta situación obrigou a parar a produción en Megasa.
“De maneira inmediata, o organismo regulador levou a cabo as comprobacións pertinentes a través da súa rede automática de estacións de vixilancia radiolóxica, confirmando que o suceso non tivera repercusión para o medio ambiente, posto que as medidas de radiación fóra da instalación presentaban valores habituais”, segundo informa o CSN nun comunicado.
Como se identificou?
Ao parecer, o incidente foi identificado polos pórticos de detección, ao producirse unha alarma de radioactividade durante a saída dun camión cargado con po de depuración. Ante este feito, o persoal da instalación detivo a produción de aceiro e a saída de produtos da instalación, seguindo o Procolo de colaboración sobre a vixilancia radiolóxica dos materiais metálicos.
Despois de informar ao CSN, Megasa iniciou as xestións necesarias para realizar unha caracterización radiolóxica da planta e comprobar o grao de afectación. Actualmente, a empresa ten parada a produción de aceiro e o sistema de extracción de po de fume, á vez que os materiais contaminados se atopan illados e acordoados no interior da instalación.
O CSN enviou o pasado luns un inspector á instalación para comprobar a situación e para poder autorizar a saída dos materiais que non resultaron contaminados. Despois da revisión, o organismo vai requirir a Megasa que comprobe que “ningún traballador se viu afectado e que elabore un plan para a limpeza e descontaminación da instalación”.
