A piques de rematar o ano máis cálido dende que existen rexistros, as miradas están postas no tempo para Noitevella. Os últimos días de decembro en Galicia atópanse nunha situación intermedia entre altas e baixas presións. Agárdase chuvia en Noitevella, con todo, MeteoGalicia apunta que serán xornadas “tranquilas” dende o punto de vista meteorolóxico, con precipitacións débiles e ocasionais. O 31 pode haber precipitacións pola madrugada de tipo intermitente pero, en xeral, Galicia poderá desfrutar dun tempo seco durante toda a fin de semana.
O sábado 30 Galicia quedará baixo a influencia dunha borrasca situada ao oeste de Irlanda. Os ceos estarán máis cubertos no sur e no oeste, mais poderán abrirse grandes claros en Lugo. A noite do 30 ao 31, unha fronte atravesará Galicia que deixará chuvias persistentes e xeneralizadas en toda a comunidade. Os ventos soprarán fortes de compoñente sur, especilamente no litoral da Coruña. As temperaturas serán estables: as máximas situaranse por enriba dos 12 graos en todas as provincias.
Despois dunha noite de chuvia, o día 31 agárdanse ceos nubosos e con posibilidade de precipitacións de tipo intermitente, máis probables no norte da comunidade. “Os ventos soprarán de compoñente oeste, frouxos no interior, moderados na costa, con intervalos fortes no extremo norte”, apuntan dende MeteoGalicia. Da mesma maneira, a noite agárdase “tranquila”. Xa na xornada de Aninovo, Galicia estará baixo a influencia doutra borrasca que poderá deixar chuvias no extremo norte.
Segundo apunta eltiempo.es, Galicia será a comunidade onde máis chova durante esta festividade, puidendo superar os 60mm. No resto da península, as frontes poderían deixar precipitacións pero de carácter débil. De cara ao martes e mércores, é probable que entre unha fronte máis activa.
