Agosto está a piques de chegar á súa fin. Inevitablemente, o remate do verán tamén está cada vez máis preto. Uns meses marcados por unha acusada falta de precipitacións, unha intenta seca e, en xeral, unhas temperaturas máis elevadas do habitual. Un cóctel perfecto para un escenario nefasto ao que Galicia, por desgraza, está máis acostumada do que debería: os incendios. Os lumes arrasaron miles e miles de hectáreas. Dous deles, de feito, xa son considerados os peores da nosa historia dende que hai rexistros. Son os incendios que arrasaron O Courel e a zona de Valdeorras. Pero hai outros moitos lugares que se viron afectados polos lumes. Entre algúns dos máis hectáreas destruíron: Vilariño de Conso, Boiro, Laza, Lobeira, O Irixo… E tantos outros.
A gran onda de incendios do que vai de ano produciuse a mediados de xullo. As súas feridas son facilmente visibles a través das imaxes de satélite, como as que ofrece o Sistema Europeo de Información sobre Incendios Forestais (EFFIS, polas súas siglas en inglés). Despois dunha tormenta explosiva e inesperada, miles de raios provocaron lumes en zonas inaccesibles ou de orografía complicada. Os grandes afectados foron os espazos protexidos, como O Courel. Estímase que se queimou unha terceira parte do parque natural, posto que foron 11.100 as hectáreas arrasadas. Un lume que, durante días, se tornou incontrolable, ata que ficou extinto o 28 de xullo.
O peor do verán foi o do Courel, con 11.100 hectáreas arrasadas
Relativamente preto do Courel, outra importante área natural quedou danada. Un lume, cuxa orixe tamén estivo nos raios da tormenta explosiva de xullo, afectou especialmente a Carballeda de Valdeorras. O balance final: 10.500 hectáreas e a Serra da Enciña da Lastra, outro espazo natural tamén ferido. A este segundo gran incendio seguiuno de preto o de Vilariño de Conso con 6.500 hectáreas afectadas e outro espazo protexido tremendamente danado: o Invernadeiro. Estes dous grandes lumes, situados no podio dos máis devastadores deste verán, coincidiron no tempo e tamén quedaron extintos hai aproximadamente un mes.
Os lumes de agosto
No que respecta a agosto, unha das zonas máis afectadas foi o Barbanza, con Boiro á cabeza. Un lume que comezou o xoves 4 arrasou 2.200 hectáreas, o peor dende que comezou o mes. Tamén o incendio de Laza e Chandrexa deixa máis de dous milleiros de hectáreas queimadas. Os seguintes na lista son o do Irixo, con 680, e o de Lobeira, con 625,5 hectáreas. O máis salientable deste último é que, tal e como aconteceu en xullo, un parque natural de altísimo valor medioambiental se viu afectado: o de Baixa-Limia-Serra do Xurés.
