Hai case catro anos e medio a Xunta de Galicia publicaba o primeiro balance anual dos concellos nos que se detectaran niños da Vespa velutina, a avespa asiática que hoxe é xa unha praga preocupante no país. O mapa amosaba dous puntos nos que o problema xa despuntaba: varios concellos da Mariña Lucense e o Baixo Miño aparecían con máis de cinco niños retirados. En 2019, en só 100 días de ano, a expansión multiplicouse: son máis dunha vintena de municipios nos que se atoparon entre 26 e 100 niños.
O máis preocupante, con todo, é que cada vez hai menos zonas libres de velutina. Mentres que nos anos previos a retirada dos nespreiros se concentraba na faixa atlántica, os datos que publica a Consellería de Medio Rural, actualizados a 15 de abril, o oriente de Galicia parece enfrontarse a un ano que vai confirmar a expansión da especie exótica invasora ao conxunto do territorio.
É unha tendencia que xa se advertiu nalgún dos encontros científicos nos que se abordou o problema. A comezos de abril, nun encontro celebrado no Consello da Cultura Galega, o investigador Luís Rodríguez Lado presentou os primeiros resultados de VeluMap, un mapa de predición sobre a expansión da avespa nos vindeiros anos. Este avance cara a zonas interiores, cunha notoria actividade apícola, podería comprometer, do mesmo xeito, esta actividade económica, que xa está resultando afectada nos últimos anos, cun descenso da súa produción debido ao ataque da velutina ás colmeas.
A expansión da velutina
Desde que se detectou en 2013 por primeira vez en Galicia (a Europa chegara por mar a Francia, en 2004), o insecto de orixe asiática medrou de xeito exponencial do país. A pesar do intenso trampeo promovido desde as Administracións públicas, este método semella que, ata o de agora, non foi quen de frear o avance da especie. Non en tanto, algúns estudos científicos cuestionan a eficacia do trampeo masivo e avogan por buscar camiños alternativos na investigación.
