Esta fin de semana Galicia estará baixo os efectos de Domingos, unha profunda borrasca cun impacto similar á borrasca Ciarán, que todavía descargará intensas precipitacións durante o día e a noite do venres. Xa na xornada do sábado entra esta nova borrasca por Galicia e volverá afectar de cheo a toda a península. Unha fronte fría asociada a Domingos cruzará toda España. As precipitacións serán xeneralizadas en Galicia pero os protagonistas serán os refachos de vento, que superarán os 100 km/h, especialmente na provincia da Coruña e na Mariña Lucense. O sábado será o día de máis vento e chuvia. As ondas no mar poderán superar os oito metros, o que mantén activada a alerta vermella por temporal marítimo en toda a costa galega.
De cara a noite do venres, baixo a influencia de Ciarán, as precipitacións serán intensas e persistentes, cunha situación moi complicada no mar con ondas superiores aos sete metros. A mañá do sábado, apunta MeteoGalicia, o vento soprará moi forte de compoñente oeste, con refachos de vento de máis de 80 km/h en terra e máis de 90-100 km/h no litoral norte e zonas altas. Dende MeteoGalia informan que as zonas máis afectadas por Domingos serán o oeste e noroeste da Coruña e a Mariña de Lugo. Tamén rexistran alerta laranxa algunhas zonas do interior, litoral e Miño de Pontevedra, que poderán acumular máis de 80 l/m² en 12 horas; en Ourense os avisos están activos no sur e na Montaña de Ourense por chuvia e vento.
As temperaturas non experimentarán grandes cambios. Na Coruña, Ourense e Ferrol os termómetros marcarán máximas de 17 graos; Vigo poderá chegar aos 18 e Pontevedra aos 19; Lugo e Santiago de Compostela son as cidades con máis frío. Xa de cara ao domingo, descenden lixeiramente as temperaturas.
Vai nevar esta fin de semana en Galicia?
De momento, dende MeteoGalicia informan que non se agardan nevadas esta fin de semana, mais si é posible que caia algunha folerpa. Nos últimos días rexistráronse as primeiras neves do outono, como en Cabeza de Manzaneda, cuxa estación amaneceu o 30 de outubro cuberta de neve. “Tivemos algo de neve pero a partir do sábado a cota dispárase”, explican. O organismo insiste en que sen dúbida, o fenómeno máis importante da primeira fin de semana de novembro serán os ventos. A AEMET apuntou que é “bastante probable” que durante o domingo a nova fronte se afaste polo mar do Norte.
