A borrasca Ciarán deixou unha longa lista de incidencias en toda Galicia durante as últimas horas. Máis alá das árbores caídas e dos cortes de luz, canceláronse varios voos e interrumpiuse a circulación de tren nalgúns traxectos. Os efectos do tamén denominado “ciclón bomba”, situado sobre as illas británicas, continuarán este xoves con alerta vermella en todo o litoral galego, agás a Mariña lucense, por ondas que poderán superar os oito metros. Tamén se rexistrarán refachos de vento superiores aos 100 km/h e precipitacións intensas, con acumulados superiores aos 40 l/m2 en tan só 12 horas. Pero este escenario adverso está lonxe de remitir e, segundo informa a Axencia Estatal de Meteoroloxía (AEMET), o episodio prolongarase ata o domingo. Malia que Ciarán perderá forza este venres, o sábado entrará outra profunda borrasca, que aínda non está nomeada, e que poderá deixar precipitacións aínda máis intensas.
Dende Meteogalicia confirman a chegada deste sistema que se situará entre Irlanda e Galicia, deixando un novo episodio de temporal e vento similar ao de Ciarán. Está previsto que as precipitacións sexan máis intensas durante as primeiras e derradeiras horas do día. De novo, o vento soprará con intensidade, con refachos moi fortes tanto no litoral como no interior. No que respecta ás temperaturas, experimentarán un lixeiro ascenso, dado que a entrada dunha masa de aire frío polos efectos de Ciarán deixarán entre xoves e venres os valores entre 13 e 15 graos de máxima na meirande parte de Galicia.
Segundo explica o divulgador Víctor González nun artigo publicado en Meteored, a borrasca que se achegará o sábado a Galicia vai completar o seu proceso de cicloxénese explosiva na metade do Atlántico. Iso significará que os efectos que terá en Francia e nas Illas Británicas serán previsiblemente menos intensos que os de Ciarán, e que terá un núcleo menos intenso. Porén, os efectos sobre Galicia serán moi semellantes ao “ciclón bomba” que nos está a afectar. De feito, os refachos de vento tamén poderán acadar os 100 km/h e incluso poderán superarse nas zonas de montaña e de costa. O que pode ser “potencialmente máis adverso” que con Ciarán serán as precipitacións. “Volverán acumularse cantidades que poden exceder os 50 l/m2 en 12 horas en zonas de montaña do oeste peninsular”, apunta González. A maiores, vaise fundir boa parte da neve que deixou Ciarán, o que aumentará considerablemente o caudal dos ríos en Galicia.
Canto rematará este episodio?
Os efectos de Ciarán serán especialmente adversos este xoves, cun “temporal marítimo duro” no litoral de Galicia, segundo informan dende Meteogalicia. O venres as chuvias, o vento e a oleaxe non serán tan intensos como o xoves, pero o mar seguirá en mal estado. E tanto o sábado como o domingo a chegada dunha nova e profunda borrasca atlántica volverá causar un tempo adverso, moi semellante ao que deixou Ciarán ao seu paso. Dende a AEMET confirman que é “bastante probable” que durante o domingo a nova borrasca se afaste polo mar do Norte, polo que se daría rematado este episodio adverso. Segundo González, a situación non remitirá totalmente ata as primeiras horas do luns.
