Cal é a calidade de vida de Galicia? A Organización para a Cooperación e o Desenvolvemento Económicos (OCDE) deseñou un mapa interactivo onde se pode descubrir o benestar das rexións que forman parte deste organismo. En cada territorio mídense once temas importantes para a calidade de vida das persoas e Galicia suspende en varios apartados: educación, emprego, ingresos e satisfacción coa vida. Sobresae, en cambio, en seguridade e saúde e acada tamén boas notas en medio ambiente e sentido de comunidade.
Estes datos forman parte dunha longa lista de puntuacións que recompilou a OCDE dende 2018. Os datos para a serie española abranguen dende o 2018 ata o 2021 e nestes pódense descubrir os temas máis importantes para o benestar dos galegos.
A peor puntuación vai para a sección dos ingresos: un 3,2 sobre 10. Respecto ao resto de España, a comunidade atópase á cola e, en comparación con todas as rexións da OCDE, sitúase no 48% daqueles países que menos cartos ingresan. Galicia suspende, aínda que cun pouco máis de nota, sobre a calidade dos traballos. Atópase no 23% inferior en comparación coas rexións da OCDE e na posición número nove en España. Suspende cun 4,6.
Da mesma maneira, un pouco menos da metade da poboación galega non está satisfeita coa súa vida. A comunidade suspende cun 4,2 e é case das últimas de España, por detrás de Estremadura (2,7) e Asturias (1,2). Por último, e case aprobando, alcanza os 4,9 puntos en educación. Segundo os datos obtidos pola OCDE, a poboación con educación secundaria é do 63,9%. Isto colócaa no posto 11, por detrás de Andalucía, Murcia e Valencia.
O 93,2% dos galegos perciben unha rede de apoio social
En canto ao compromiso cívico, Galicia aproba pero con moi pouca nota, e neste ámbito só suspenden Asturias, Canarias e Illas Baleares, que están por detrás. O mapa da OCDE indica que dende os 2000 Galicia empeorou nesta sección. Con todo, obtén unha fantástica nota en comunidade: un 8,2, o que a coloca no 26% superior das rexións da OCDE. O 93,2% dos galegos perciben unha rede de apoio social.
En vivenda, Galicia consigue un notable baixo pero, en comparación co resto de Estado, é a segunda mellor comunidade no respectivo ao aloxamento. A OCDE indica un 2,2 habitacións per cápita; o que a sitúa tamén no 21% superior nesta categoría en comparación coas 447 rexións que se analizan neste mapa.
O estudo analiza tamén o acceso a internet da nosa comunidade. Os 93,2% dos galegos teñen acceso de banda ancha nos fogares. Con todo, o indicador de velocidade de Internet si que diminúe: 24,5%. Os galegos aproban cun 8,4 puntos o acceso aos servizos. Cunha nota parecida, a categoría de medio ambiente coloca a Galicia como a quinta comunidade con mellor puntuación neste ámbito. Un dos indicadores que se mide é a calidade do aire.
As mellores notas: saúde e seguridade
Galicia alcanza 9,3 puntos en saúde. Isto colócaa na terceira posición na lista española. En comparación con todas as rexións da OCDE, atópase no 7% superior en saúde. A taxa de mortalidade é de 6,5 mortes por cada 1000 persoas e a esperanza de vida, segundo os datos do organismo, de 83,7 anos.
Con aínda máis nota, Galicia consigue case un pleno na sección de seguridade: logra un 9,8 sobre 10. Con todo, non está nas primeiras de España, posto que a meirande parte dos territorios acadan un sobresaínte. Asturias consigue un 10. Un dos indicadores que se tiveron en conta para elaborar esta estatística é a taxa de homicidios, habendo un 0,7 por cada 100.000 persoas.
Pois imos ter que andar con moito tino con iso de que “Galicia alcanza 9,3 puntos en saúde”. Se “pillan” isto os que están a ocupar casi eternamente os sillóns do goberno galego, poñen a funcionar a toda máquina as caterpillar e, así, darlle a estocada final a sanidade píublica.
Sí, será que somos duros como pedras, non grazas ós nosos políticos e á súa xestión da Sanidade.