Nas conversacións informais escóitase unha queixa común: “Semella que o verán non chega este ano a Galicia”. Hai días puntuais de temperaturas altas e ceos solleiros, pero ata o de agora as tendencias no norte da península son máis tépedas que outros anos, malia que a maioría das oficinas de vixilancia do clima apostaban por unha tempada que entraba directamente no podio dos veráns máis calorosos da historia de España.
As principais cidades de Galicia amencen hoxe con ceos parcialmente nubrados e temperaturas que roldarán os 20 º C nas súas máximas, agás nalgúns puntos do sueste, onde os termómetros poderían acadar os 27 graos. O paso dunha fronte polo extremo norte peninsular vai deixar nas xornadas de hoxe e de mañá episodios de choivas e ata de tormentas eléctricas nalgúns puntos do norte, incluíndo á capital de Galicia.
Un xuño frío para a totalidade da península
Segundo a Axencia Estatal de Meteoroloxía (AEMET), o pasado mes de xuño presentouse unha anomalía negativa: isto quere dicir que as temperaturas foron máis frías este 2024 en comparación cos anos anteriores nesta mesma tempada. E non só en Galicia: a península non experimentou aínda unha onda de calor como as que se viviron o pasado verán e, de feito, segundo o mesmo informe da AEMET, o mes de xuño deste ano foi o quinto máis chuvioso deste século: “As precipitacións acadaron o 150 % do seu valor normal”. Isto como se explica?
Nun fío de X, o doutor en Física e meteorólogo da AEMET JJ González Alemán amosaba un mapa e explicaba que, neste 2024, os episodios de calor extrema si se están dando de igual xeito que Nos derradeiros anos, só que noutras rexións: “Este vez tocoulle ao Mediterráneo oriental e a Escandinavia”. Doutra banda, dende MeteoGalicia a resposta é contundente: Temos unha idea moi errada sobre o que implica o verán no noso territorio.
O panorama xeral podería mudar esta semana coa chegada dunha masa de aire quente dende África, a cal traerá temperaturas de ata 40 º C á meirande parte da península ibérica. Algunhas rexións experimentarán noites tropicais, segundo prognostican as previsións meteorolóxicas. Mentras tanto, unha rexión no norte de España resiste a chegada da calor de igual xeito que os irredutibles galos rexeitaban a invasión dos romanos.
Temperaturas dentro da normalidade
Ata o martes Galicia manterase baixo unha influencia anticilónica débil e con ventos que deixarán ceos nubrados no oeste e néboas no oeste. As temperaturas mínimas baixan en toda a comunidade, pero as máximas experimentarán un ascenso lixeiro. Na metade da semana chegarán as primeiras máximas de ata 30 ºC nalgunhas zonas de Lugo e Ourense. Segundo MeteoGalicia: “Galicia atoparase durante esta xornada nunha situación atmosférica moi indefinida, aínda que con predominio da estabilidade”.
De cara á fin de semana, predominarán no territorio galego as condicións anticiclónicas que deixarán mañás con ceos nubrados e tardes máis solleiras, cunhas temperaturas que roldarán os 25 – 30 ºC, sendo as propias desta época do ano.
