O Grupo de investigación VIOR (Viticultura, Oliveira e Rosa) da Misión Biolóxica de Galicia (MBG-CSIC) logrou un dos galardóns que entrega a Academia do Perfume: o premio á innovación e sustentabilidade, na XVI edición da gala anual que convoca a institución, cuxa misión é divulgar o perfume como un legado cultural. Este recoñecemento foi para o proxecto de descubrimento e selección da Rosa Narcea e os estudos sobre os seus aceites esenciais e outros extractos para a súa comercialización na industria cosmética e a perfumería internacional.
A científica do CSIC Carmen Martínez, directora do Grupo VIOR, que liderou a investigación, recolleu con gran satisfacción o galardón xunto ao investigador José Luis Santiago. Resaltou que, na actualidade, están implicados neste estudo 30 científicos de distintos centros do CSIC e universidades nacionais e estranxeiras. Un dos seus principais valores é que este proxecto nace vinculado á Plataforma Alternativas Científicas Interdisciplinares contra o Despoboamento Rural (ALCINDER), e un dos seus obxectivos é ofrecer esta rosa como un novo recurso agrario con enorme potencial para fomentar o emprendemento en Asturias, unha das cinco rexións europeas con maior nivel de envellecemento poboacional.
Carmen Martínez, que na súa traxectoria e científica sempre defendeu a transferencia do coñecemento á sociedade e ao ámbito empresarial para promover a innovación e a competitividade a través de iniciativas sostibles, considera que o cultivo e comercialización da Rosa Narcea impulsará o desenvolvemento socioeconómico do val asturiano do río Cibea (Cangas del Narcea), de onde é orixinaria esta variedade.
Pola súa banda, a directora executiva da Academia do Perfume, Val Díez, resaltou o gran interese que espertou este proxecto entre as compañías máis importantes do sector cosmético a nivel internacional, así como o avance logrado neste últimos cinco anos: desde as dúas roseiras cos que empezaron ata os 10.000 actuais. A Rosa Narcea, certificada xeneticamente, é a primeira e única rosa do mundo con uso na industria do perfume que conta co máximo nivel de protección internacional, concedido pola Oficina Comunitaria de Variedades Vexetais da Unión Europea.
A orixe do estudo
Desde o 2017, Carmen Martínez e o seu equipo investigaron e realizaron traballos de campo con esta variedade orixinaria do concello de Cangas del Narcea. Unha rosa do século XIX ou anterior, híbrido natural entre a rosa centifolia e a rosa gálica, de intenso aroma e rica en polifenois, da que se obteñen aceites esenciais que están a ser estudados e valorados pola industria do perfume e da cosmética activa. Esta rosa antiga, que foi sometida a un proceso de selección, necesita solos frescos, profundos, húmidos, sen exceso de horas de sol e con oscilacións térmicas elevadas durante a primavera, única época de floración. De aí a importancia de que sexa cultivada na zona de montaña de onde é orixinaria.
O Grupo de investigación da MBG xa conta con varias parcelas experimentais para ensaios e experiencias demostrativas, en colaboración cos agricultores locais, aos que guiarán no seu cultivo. “Desde o ámbito científico, perseguindo os obxectivos expostos na nosa Plataforma ALCINDER, estamos a xerar novas oportunidades para o emprendemento na contorna rural, contribuíndo a afianzar poboación nunha zona onde o envellecemento poboacional é unha realidade”, sostén Carmen Martínez.
