A última semana de abril arranca cos termómetros acadando máximas superiores a 20 graos en varios puntos de Galicia, unha temperatura anormalmente elevada para esta época e que vén acompañada de po en suspensión. A partir deste martes está previsto un descenso nas temperaturas das catro provincias da comunidade. A formación de dúas dinas enmarcando a península, unha delas rozando a costa norte galega, aumentará a inestabilidade meteorolóxica, que se manterá ata o comezo de maio.
O avance dos días irá acompañado por tormentas. De feito, hai alertas amarelas activas por treboadas en Ourense entre o luns e o mércores e, a partir do mércores, tamén en Lugo. Os avisos por ventos fortes manteranse ata o martes na costa norte. Estas treboadas terán especial incidencia en zonas montañosas de Lugo e Ourense e veranse influenciadas polos cambios no chorro polar: trátase de correntes de aire que nacen do contraste entre o aire frío e o ambiente cálido. Como informa Meteored, o chorro polar será moi ondulado e fragmentado, o que potenciará a inestabilidade da segunda metade da semana.
O mércores será o día con maior incerteza: os cumulonimbos —formacións nubosas densas con desenvolvemento vertical— deixarán tormentas e precipitacións localmente intensas, acompañadas de saraiba e fortes ventos que afectarán múltiples puntos do interior de Galicia.
A inestabilidade pronunciarase pola presenza dun anticiclón situado entre as illas británicas e Escandinavia, pois favorecerá o descenso do aire frío. Neste contexto, formaranse dúas dinas (depresións illadas en niveis altos) que flanquearán a península polo norte, rozando a Mariña lucense, e o oeste.
Maio entra con inestabilidade
Prevese que a ponte de maio chegue con precipitacións que terán especial incidencia no noroeste e se asentarán entre o venres e o sábado. Para o venres 1 de maio, festivo nacional, Galicia atoparase baixo unha vagada —unha ondulación latitudinal descendente— que propiciará novas treboadas localmente intensas.
