Un equipo internacional dirixido polo Instituto Español de Oceanografía (IEO-CSIC) documenta por primeira vez no litoral galego a macroalga invasora tropical Asparagopsis taxiformis. O estudo publicado na revista Bioinvasions Records recolle o achado dun exemplar encontrado nas Rías Baixas en 2025. O descubrimento supón a cita máis setentrional rexistrada ata a data en augas europeas e amplía significativamente a súa área de distribución coñecida, cunha expansión de máis de 500 quilómetros.
As análises moleculares do exemplar confirmaron que pertence á liñaxe 2 de Asparagopsis taxiformis, unha variante cunha alta capacidade invasiva e alta tolerancia ambiental, o que podería facilitar a súa supervivencia en augas temperadas como as de Galicia. “Aínda que a poboación detectada parece ser aínda incipiente —así o suxire a ausencia de estruturas reprodutivas—, este achado destaca como o quecemento das augas e as actividades humanas poden favorecer a chegada e o establecemento de especies adaptadas aos tropicais en ecosistemas temperados”, afirma Eva Cacabelos, investigadora do IEO de Vigo e primeira autora do estudo.
Interacción con outras invasoras
A este escenario súmase unha ameaza adicional identificada polo equipo de investigación: o risco de coinvasión. O estudo indica que a posible coexistencia de Asparagopsis taxiformis con outras macroalgas invasoras introducidas recentemente na zona, como a agresiva alga asiática Rugulopteryx okamurae, podería intensificar drasticamente os impactos ecolóxicos. A interacción simultánea de múltiples especies exóticas ten a capacidade de monopolizar o substrato, exacerbando a alteración dos ecosistemas bentónicos autóctonos.
O traballo subliña a importancia da alerta temperá e a monitorización continua para anticipar os posibles impactos e cambios ecolóxicos nas comunidades mariñas gallegas. Ademais do IEO-CSIC, o artigo contou coa participación de persoal investigador de organizacións nacionais como o Centro IFAPA El Toruño, o Instituto de Investigacións Mariñas da Universidade de Cádiz e a Universidade de Málaga.
Referencia: Northernmost occurrence of the tropical invasive red alga Asparagopsis taxiformis (Bonnemaisoniales, Rhodophyta) in European Waters (Publicado en Bioinvasions Records)
