Un equipo da Universidade da Coruña (UDC) vén de descubrir unha nova especie exótica invasora no encoro de Cecebre, na Coruña. Trátase da planta acuática Crassula helmsii, orixinaria de Australia e Nova Zelandia, que se adoita utilizar para decorar e osixenar estanques e acuarios. O achado, que acaba de publicarse na revista Biological Invasion, supón o primeiro rexistro confirmado desta especie na península ibérica. Os científicos galegos piden maior vixilancia ante a entrada de novas invasoras, dado que Crassula helmssi pode causar danos en lagos e encoros, así como afectar á calidade das augas e á flora e fauna nativas.
Os investigadores da UDC Jaime Fagúndez, María José Servía, Anxo Balado, Eva Martínez Veiga e Miguel A. Fernández estudaron a contorna do encoro de Cecebre, que subministra auga a unha boa parte da cidade da Coruña, e fixeron 12 mostraxes ao longo das marxes da presa. En 10 delas atopouse a planta na súa forma emerxida e cun valor medio de cobertura. Outro dos aspectos sinalados no artigo, máis alá de que se dispersa pola fragmentación dos talos, é a posible sinerxia con outra invasora: o cangrexo de río americano (Procambarus clarkii). “Podería existir un beneficio mutuo para as dúas especies que agrave o problema no encoro”, sinalan os autores.
Erradicación “practicamente imposible”
Segundo a información recollida polo Ministerio para a Transición Ecolóxica e o Reto Demográfico (Miteco), Crassula helmsii é unha especie “extremadamente competitiva” que “reduce significativamente a xerminación das plantas nativas”. Máis en detalle, explícase que pode diminuír as poboacións de invertebrados, ras, tritóns e peixes, ao tempo que obstrúe vías fluviais e drenaxes. Precisamente polos danos que causa, os científicos da UDC piden unha maior vixilancia non só desta especie, senón das invasoras en xeral, dado que a mellor maneira de evitar os seus prexuízos é actuar nas primeiras etapas.
“Unha vez establecida, a súa erradicación é practicamente imposible, salvo que sexa factible desecar o sombrear o estanque”, apunta o documento do ministerio. Sinala varias medidas para evitar a súa propagación como a colocación de redes río abaixo ou nos puntos de entrada para impedir a circulación dos talos desprendidos. Tamén, a realización dun seguimento cada tres ou seis meses durante os cinco anos seguintes á eliminación de Crassula helmsii. Dende o Miteco acosellan, ademais, que as zonas próximas estean controladas e vixiadas para evitar novos gromos. Con todo, o método de control vai depender da superficie afectada e das especies nativas que queden.
Referencia: First record of the semi-aquatic invasive plant Crassula helmsii in the Iberian Peninsula and its link to potential dispersal drivers (Publicado en Biological Invasions)
