A Axencia Estatal de Meteoroloxía (AEMET) anuncia niveis moi altos de Índice Ultravioleta en toda España para este mércores 29 e este xoves 30 de maio. En Galicia, as predicións apuntan a un Índice UV 8, que significa un impacto “moi alto” destes raios. Dende Meteogalicia informan de que, coa inminente entrada no mes de xuño, o aumento deste valor entra dentro da normalidade anual. Con todo, a pesar do habitual deste fenómeno, anuncian que cómpre tomar as precaucións necesarias para combatilo, que pode chegar a provocar melanoma e outras formas de cancro cutáneo.
Entre as medidas de protección recomendadas, aconséllase un correcto emprego de productos fotoprotectores, sobre todo en nenos. No Índice UV 8, no que se atopará Galicia estes días, recoméndase o emprego de FPS 30 ou maior, xunto ao uso de sombreiro, roupa e lentes de sol. Ademais, deberíase evitar a exposición solar dende as 12 ata as 16 horas, que comprenden o tempo de maior irradiación.
Mentres, os menores de 6 meses non se deben expoñer directamente ao sol, protexidos por roupa e sombra. Non é aconsellable aplicar ningún produto fotoprotector, pois a súa pel non é o suficientemente madura para afrontar estas substancias. Se a exposición é inevitable, pódese empregar unha crema solar en pequenas áreas corporais que non poidan ser cubertas por roupa, como a cara ou as mans.
Podes consultar as medidas de protección recomendadas por Meteogalicia nesta ligazón.
