As máximas non van superar os 16 graos na Coruña e as mínimas descenderán ata os 6 graos en Lugo durante esta fin de semana. As temperaturas serán máis suaves no sur, pero non subirán dos 20 graos en Ourense, Pontevedra e Vigo. Esta baixada térmica débese a un cambio na configuración atmosférica. O anticiclón das Azores, situado ao oeste de Galicia, xunto cunha borrasca no Mediterráneo, propician un corredor de ventos do norte que traerá aire de orixe polar esta fin de semana. As temperaturas non serán tan baixas como poderían ser durante o inverno, pero tampouco serán as esperables para esta época do ano.
O tempo, por tanto, é primaveral e cambiante. En parte, polo movemento do anticiclón das Azores, que pode provocar un episodio de calor, como o da pasada semana, ou propiciar a chegada de masas de aire que arrefríen o ambiente. A inestabilidade aumentará, segundo explican dende Meteogalicia, a partir do venres, coa entrada de aire frío nas altas capas da atmosfera. As temperaturas mínimas oscilarán entre os 7 e os 11 graos e as mínimas non subirán máis alá dos 20 graos na metade sur.
O sábado experimentarán un lixeiro ascenso, pero non demasiado significativo. A Coruña e Ferrol seguirán nos 16 e 17 graos de máxima, respectivamente, mentres que Vigo e Ourense rozarán os 22 graos. O resto de cidades, Santiago, Pontevedra e Lugo, terán valores que oscilen nese tramo, tamén sen grandes cambios. O domingo tamén se manterán nestas cifras, que non son demasiado altas para esta época do ano, segundo recollen en Meteogalicia.
Tempo seco
No que respecta ás precipitacións, o tempo durante a fin de semana será, en xeral, seco. Mais si que se rexistrarán algunhas precipitacións illadas nalgúns puntos do país. O venres, por exemplo, agárdanse chuvascos máis intensos e frecuentes no norte e leste de Galicia, mentres que o sábado tan só se rexistrarán durante a mañá no norte da provincia de Lugo. Coa entrada da vindeira semana, Meteogalicia advirte do aumento de probabilidades de chuvias, sobre todo na metade norte. E as temperaturas, polo momento, manteranse sen cambios e máis baixas do esperable para o mes de maio.
