Únete á nosa canle de Whatsapp
A choiva de estrelas máis importante da primavera, as ‘Eta Acuáridas’, comezou a coruscar no ceo dende o pasado 20 de abril e ata o próximo 20 de maio, aínda que chegarán ao seu máximo na madrugada do 6 de maio.
Esta choiva de estrelas prodúcese porque a Terra, na súa órbita arredor do Sol, atravesa dúas veces a banda de refugallos deixada polo cometa Halley producindo o fenómeno das Eta Acuáridas en primavera e o das Oriónidas, no outono.
As pequenas partículas que deixou o cometa traspasan a atmosfera terrestre, e tras desintegrarse brillan como estrelas fugaces que podemos gozar no ceo.
As Eta Acuáridas reciben o seu nome porque o seu radiante parece centrarse na constelación de Acuario, preto dunha das estrelas máis brillantes da constelación, Eta Aquarii.
A Lúa nova non interferirá coa observación da choiva de estrelas, que despois das 4 da madrugada ata antes do amencer do 5 e 6 de maio estará en máxima actividade
A cantidade de meteoros pode chegar a 20 por hora para os observadores no hemisferio norte. Estas taxas son moito maiores para os observadores do hemisferio sur. A razón é simple: a constelación de Acuario está moito máis alta no ceo ao sur do ecuador.
Aínda que os días de máxima actividade serán no 5 e 6 de maio, este fenómeno tamén se pode apreciar uns días antes e despois desas datas. Hai que lembrar que non é necesaria a utilización de binoculares ou telescopios para a observación e, como sempre, o mellor é afastarse das cidades e da contaminación lumínica para disfrutar do espectáculo.
E aquí podes ler a nosa reportaxe sobre o cometa Halley en Galicia:
O Halley en Galicia en 1910 e 1986: así se viviu o paso do cometa
